Dzyudochilarimiz Kyrgyzstan Open turniridan 7 ta medal bilan qaytishdi

Qirg'iziston Respublikasida xizmat ko'rsatgan murabbiy Petr Telpizov xotirasiga bag'ishlab o'tkazilgan Kyrgyzstan Open musobaqasida Rustam Farhodov murabbiyligidagi o'zbekistonlik dzyudochilar ham ishtirok etishdi. Musobaqa 2002-2003, 2004-2005 yillarda tug'ilgan o'smirlar va qizlar, shuningdek, 2008-2009 yillarda tavallud topgan qizlar o'rtasida tashkil etildi. 

Xalqaro turnirning birinchi kuni 2002-2003 yillarda tavallud topgan dzyudochilar o'rtasida g'olib va sovrindorlar nomi malum bo'ldi. Musobaqada -73 kg vazn toifasida yurtimiz sharafini himoya qilgan Ilyos Safarov hamda +90 kg vazndagi Abbos Ismoilov barcha raqiblarini mag'lub etib, musobaqaning oltin medalini qo'lga kiritdi. 

Musobaqaning 2004-2005 yillarda tug'ilgan o'smirlar bahsida Muhammadali Tangriev (-81 kg) shoxsupaning eng yuqori pog'onasiga ko'tarildi. Ushbu vazn finalida tatamiga chiqqan Mirshod Muhammadov kumush medalga sazovor bo'ldi. 

-73 kg vazndagi vakilimiz Javohir Muhiddinov bronza medali bilan taqdirlandi. +81 kg vazn toifasida tatamiga chiqqan Abdullo To'xtamishov oltin, Abbos Ismoilov kumush medal egasiga aylandi.