Eddi Xirn Bob Arum va Naoya Inoueni muxlislarni aldamaslikka va Murodjon Ahmadaliev bilan jang qilishga chaqirdi

Avvalroq, WBA tashkiloti ikkinchi eng engil vazn toifasida kamarga majburiy davogar bo'lib turgan hamyurtimiz Murodjon Ahmadaliev hamda chempion Naoya Inoue jangiga rasman buyruq bergandi. Biroq Naoya jamoasi bu jang rejadan tashqarida ekani va ular sentyabr oyida boshqa bokschiga qarshi jang qilishi haqida gapirdi.  

"Men o'zimni yomon his qildim. Ti Jey Doxeni menga yoqadi. U yaxshi jangchi edi. U 5 yil oldin Danil Romanga mag'lub bo'lgan. Bu divizionda raqobatga ega yagona jang bu - Ahmadaliev bilan bo'ladigan jangdir. Kechirasizlar-u, Ti Jey Doxenining Naoya Inoue bilan jangida umuman raqobat yo'q. Kelinglar, jiddiy yondashamiz. Ti Jey Doxeni bilan yaxshi jang bo'ladi. U yaxshi jangchi, Jahon chempioni bo'lgan. Lekin bizni aldamang. Raqobatga ega yagona jang bu Ahmadaliev bilan. U majburiy davogar. Naoya Inoue maqtovlarga sazovor bo'lishi uchun ham Murodjon bilan jang qilishingiz kerak. Bu yaxshi jang bo'lardi. Ahmadaliev bilan jang qilmaslikka sabab yo'q. Bu yuqori darajadagi jang. Sem Gudmanga ham hurmatni saqlagan holda aytaman, u Naoyani enga olmaydi. Hatto Ahmadaliev ham bu ishni eplay oladi, deb ayta olmayman. Lekin shuni aytishim mumkin-ki, Murodjonda imkoniyat ko'proq, qolganlarga qaraganda", deya vaziyatga o'z munosabatini bildirdi Eddi Xirn.