Eron terma jamoasiga Misrga qarshi o'yindan 2 kun oldin AQSHga kirishga ruxsat berildi

AQSH Jahon chempionatida Eron terma jamoasi uchun cheklovlarni yumshatib, ularga Misrga qarshi o'yindan ikki kun oldin mamlakatga kirishga ruxsat berdi.

Jamoalar 27 iyun kuni JCH-2026 3-tur doirasida Sietldagi "Lyumen Fild" stadionida o'zaro to'qnash keladi.

Avvalroq Eron bosh murabbiyi Amir G'alenoyi jamoasiga o'yinlardan oldin AQSHga oldindan kirishga ruxsat berilmaganidan noroziligini bildirgan edi. Endi Eron terma jamoasi chorshanba kuni Amerikaga etib kelishi va o'yindan darhol keyin Meksikadagi bazasiga qaytishi kutilmoqda.

"Eronning Sietldagi uchinchi o'yinida ishtirok etishi uchun jamoaga o'yindan ikki kun oldin AQSHga kirishga ruxsat berildi.

Eron terma jamoasi o'yin yakunlangan kuniyoq mamlakatni tark etishi shart. Umumiy xavfsizlik choralari va protokol o'zgarishsiz qolmoqda.

Biz futbolchilar, xodimlar va muxlislar uchun imkon qadar xavfsiz turnirni taminlashga intilishda davom etamiz", — dedi AQSH Milliy xavfsizlik vazirligi vakili.

"Bu bizning tomonimizdan rejalashtirilgan edi. Biz dastlabki ikkita safar qanday o'tishini kuzatmoqchi edik va agar ular muammosiz o'tsa, yo'lga ketadigan uzoq vaqtni inobatga olgan holda qo'shimcha kun qo'shmoqchi edik", — dedi Oq uy ishchi guruhi va JCH-2026 tashkiliy qo'mitasi rahbari Endryu Juliani.

Eron futbol federaciyasi chorshanba kuni etib kelish uchun chora-tadbirlar ko'rilganini tasdiqladi.

FIFA qoidalari jamoalarga faqat "favqulodda holatlarda" o'yindan ikki kun oldin kelishga ruxsat beradi. Eron Tixuanadan uzoq masofa bosib o'tishi kerakligi sababli Sietlda akklimatizaciya uchun qo'shimcha vaqt so'ragan edi. Payshanba kuni ular Vashingtonda mashg'ulot o'tkazishi kerak.