Fanat Qahramonov: Ikkinchi imkoniyatdan ham foydalana olmasam boksdan ketaman!

-75 kg vaznda Jahon chempionati ishtirokchisi Fanat Qahramonov turnirdagi dastlabki jangini Andijon viloyati sharafini himoya qilayotgan Havasbek Asadullaevga qarshi o'tkazdi va g'alaba qozondi. Biz jangdan so'ng bokschimizga siz uchun ham qiziq bo'lgan bir nechta savollar bilan murojaat qildik.

- Iordaniyadagi licenzion turnirda muvaffaqiyatsizlikka uchradingiz. Tanqidlar ruhiy holatinggizga salbiy tasir qilgan, albatta. Oradan shuncha vaqt o'tdi. Hozir ringga chiqqaningizda nimalarni his qildingiz?

- Licenzion turnir boshlanishiga uch kun qolganida meni aeroportdan qaytarishgandi. Qisqa muddat ichida ko'p vazn tashladim. SHunga qaramay, 4 ta jang o'tkazdim. Afsuski, yakunda Olimpiadaga yo'llanmani qo'lga kirita olmadim. Murabbiylarim menga ikkinchi bor imkoniyat berishmoqchi. Xudo xohlasa, bu safar barchaning ishonchini oqlayman. Agar ikkinchi imkoniyatdan ham foydalana olmasam, u holda boksdan ketaman.

- Raqibingizning darajasini ko'rdingiz. Har holda Jahon chempionati ishtirokchisisiz. O'zbekiston chempionatida munosib tarzda qatnasha olmasangiz, yana "tanqidlar yomg'iri" ostida qolishdan qo'rqmaysizmi?

- Qo'rqaman, juda ham qo'rqaman. Hozirgi raqibim kecha ham ringga ko'tarilgan. Bu bokschini ilk marta ko'rdim. Ochig'i, xayron qoldim. Anchadan buyon jang qilmaganligim tufayli birinchi bahsda qiynaldim. Kuzatib borsangiz keyingilarida chiroyli jang ko'rsataman.

- CHempionlik yo'lida kimlarni o'zingizga asosiy raqib deb hisoblaysiz?

- Barcha raqiblar kuchli. Ularning orasida favoritlar deya Odiljon Aslonov, yoshlar o'rtasida Jahon chempioni Akmal Qosimovni aytgan bo'lardim.

Sarvinoz Raxmonqulova suhbatlashdi