Floyd Meyvezer professional boksga qaytishini malum qildi

24 fevral kuni 49 yoshini nishonlaydigan afsona ilk rasmiy jangini 2026 yilning yozida o'tkazishni rejalashtirmoqda. Raqib nomi keyinroq elon qilinadi. Meyvezer CSI Sports/Fight Sports promouterlik kompaniyasi bilan shartnoma imzoladi.

Bu Meyvezerning professional ringga to'rtinchi qaytishi bo'ladi. U 2007, 2015 va 2017 yillarda faoliyatini yakunlashini elon qilgan edi. Amerikalik so'nggi rasmiy jangini 2017 yilning avgustida Konor Makgregorga qarshi o'tkazib, texnik nokaut evaziga g'alaba qozongan va mag'lubiyatsiz seriyasini 50 ta g'alabaga etkazgandi.

"Men hali ham boksda yangi rekordlar o'rnatishga qodirman. Mayk Tayson bilan bo'lajak jangdan tortib mening navbatdagi professional jangimgacha - hech kim mening tadbirlarimdan ko'proq tomoshabin to'play olmaydi. Katta global auditoriyani taminlay olmaydi va ko'proq pul ishlay olmaydi", - deya Meyvezerning so'zlarini keltiradi Sky Sports.

Faoliyati davomida amerikalik bokschi o'z davrining barcha kuchli raqiblarini mag'lub etgan. Uning hisobida boks tarixidagi eng ko'p daromad keltirgan uchta jang - Menni Pakyao, Konor Makgregor va Saul Alvaresga qarshi janglar bor. Avvalroq Pakyao Meyvezer bilan 2026 yilda revansh o'tkazish bo'yicha muzokaralar olib borilayotganini malum qilgandi.