FOTO. Xayr Rio, salom Tokio! Olimpiadaning yopilishi marosimi

Sayyoramizning 207ta mamlakati sportchilari ana shu kunlar mobaynida medallar jamlanmasi uchun bahslarda ishtirok etishdi. Quvonarlisi, to'rt yillikning eng nufuzli musobaqasi O'zbekiston sporti tarixi zarvaraqlariga oltin harflar ila bitiladigan bo'ldi.

Terma jamoamiz sportchilari yakunda 4ta oltin, 2ta kumush, 7ta bronza, jami 13ta medal bilan umumjamoa hisobida 207 davlat orasida 21-o'rinni egalladi. Hali tarixda bunaqasi bo'lmagandi. Bu natija bilan Mustaqil Davlatlar Hamdo'stligi hamda Boltiqbo'yi mamlakatlari orasida Rossiyadan so'ng ikkinchi o'rinni egalladik. Qozog'iston terma jamoasi 3ta oltin, 5ta kumush, 9ta bronza medali bilan 22-pog'onadan joy oldi.

Musobaqa yakunlangach, Rio-de-Janeyro shahridagi muhtasham “Marakana” stadionida 31-Yozgi olimpiya o'yinlarining tantanali yopilish marosimi bo'lib o'tdi. Marosimning kulminacion nuqtasida Rio-de-Janeyro meri Eduardo Paes Olimpiada bayrog'ini Tokio gubernatori Yuriko Koikega topshirdi.