Gandbol murabbiylari uchun seminar

Ana shunday tadbirlardan biri Olimpiya sport turlari bo'yicha terma jamoa murabbiylari ishtirokida joylardagi murabbiylar uchun tashkil qilinayotgan onlayn seminarlardir. Bugun gandbol bo'yicha o'tkazilgan tadbirda katta tajribaga ega terma jamoa mutaxassislari viloyatlardagi 10 nafardan ortiq trenerlarga o'z bilimlarini ulashdi.

Seminarni tajribali mutaxassis Ulug'bek Ikramov olib bordi. Murabbiy o'z taqdimotida videomateriallardan keng foydalandi va zamonaviy gandbolda hujum va himoyadagi taktik yondashuvlar, metodikalar haqida atroflicha gapirib berdi. Tadbir davomida O'zbekiston gandbol federaciya bosh kotibi Ismoil Matxalikov so'z olib, bu kabi seminarlarning ahamiyati haqida o'z fikrlarini bildirib o'tdi.

“Butun dunyoda murakkab koronavirus inqirozi yuz berayotgan bir payt bo'lishiga qaramasdan hukumatimiz sport sohasini ham qo'llab-quvvatlamoqda. Davlatimiz tomondan yanada rivojlanish uchun barcha sharoitlar yaratib berilyapti. Biz bunga faqat o'z g'alabalarimiz bilan javob berishimiz lozim. Gandbolda yoshlarimiz bilan katta yutuqlarga erishdik. Ana endi asosiy terma jamoalar bilan ham yangi marralarni zabt etish kerak. Bu kabi seminarlarning tashkil qilinishi murabbiylar uchun juda ham foydali. Kelajakda mutaxassislarning tajribasini oshirish uchun onlayn va oflayn seminarlarni yanada ko'paytirishga harakat qilamiz”, – dedi Ismoil Matxalikov.

Tadbir davomida ishtirokchilar turli mavzularda o'zlarini qiziqtirgan savollariga javob olishdi.