Hikmatulloh To'raev: "Maqsadimiz - chempionlik!"

Bizning vaqt bilan bugun tongda Yaponiya poytaxtiga etib borgan terma jamoamiz kunning ikkinchi yarmida mashg'ulot o'tkazdi. Ertaga tarozidan o'tish hamda qura tashlash marosimlari bo'lib o'tadi. 

"Jahon chempionatiga tayyorgarlik ko'ngildagidek bo'ldi. Iqlim sharoitiga moslashish uchun musobaqa startidan 10 kun oldin Kunchiqar yurtga etib kelgandik. Bir hafta davomida Maydzuru shahrida o'quv-mashg'ulot yig'inini o'tkazdik. O'z oldimizga ulkan maqsadlar qo'yganmiz. Har birimiz O'zbekistonga musobaqa medallari bilan qaytmoqchimiz. Ha, jahon chempionati dzyudo vatanida bo'lib o'tadi. Lekin bu holat bizni aslo cho'chitayotgani yo'q. Xalqimiz duo qilib tursa, ona Vatanga yorug' yuz bilan qaytamiz", - deydi -73 kg vazn toifasida yurtimiz sharafini himoya qiluvchi polvonimiz Hikmatulloh To'raev. 

Takidlash joiz, jahon chempionatida eng ko'p ishtirokchi aynan shu vazn toifasida jam bo'lgan. To'qson ikki nafar polvon jahon chempionati medallari hamda Tokio-2020 Olimpiadasi medallari uchun bahslarga kirishadi. Ozarbayjonlik Rustam Orujov -73 kg vazn toifasi etakchisi hisoblanadi. Keyingi o'rinlarni Lasha SHavdatuashvili (Gruziya), Tommi Masias (SHveciya), Hidayat Xeydarov (Ozarbayjon), Akil Gjakova (Kosovo), Artur Margelidon (Kanada), Odbayar Ganbaatar (Mo'g'uliston), Toxar Butbul (Isroil) kabi mashhur dzyudochilar band etishgan.