IBA JCH-2027 uchun mukofot jamg'armasi elon qildi

Musobaqa g'oliblari esa 1 mln dollardan mukofot oladi.

Bu haqda IBA prezidenti Umar Kremlyov Istanbuldagi matbuot anjumanida malum qilgan.

Uning so'zlariga ko'ra, jahon chempionati IBA uchun asosiy musobaqa hisoblanadi. 2025 yilda Dubayda o'tkazilgan JCHning mukofot jamg'armasi 8 mln dollarni tashkil etgan edi.

"Keyingi jahon chempionatining mukofot jamg'armasi 20 mln dollar bo'ladi. Birinchi o'rin sohibi 1 mln dollar oladi", — deydi Kremlyov.

IBA World Boxing bilan muloqotga tayyor

Kremlyov World Boxing bilan kelajakdagi ehtimoliy hamkorlik yoki birlashish haqidagi savolga ham javob berdi.

U IBA ushbu tashkilot bilan muloqotga ochiq ekanini, tomonlar o'rtasida nizo yoki qarama-qarshilik bo'lmasligi kerakligini takidladi.

"Eng muhimi, bokschilarga qulay bo'lishi kerak. Biz muloqotga ochiqmiz", — deb aytdi IBA prezidenti.

Musobaqalar taqvimi muvofiqlashtirilishi mumkin

Kremlyov IBA va World Boxing musobaqalari taqvimlarini bir-biriga moslashtirish tarafdori ekanini ham bildirdi.

Uning aytishicha, asosiy maqsad sportchilarning turli tashkilotlar turnirlarida qatnashishiga to'sqinlik qilmaslik va havaskor hamda professional boks o'rtasidagi hamkorlikni rivojlantirishdan iborat.

Kremlyov Gennadiy Golovkinning boksdagi faoliyatiga yuqori baho berib, uni "afsonaviy sportchi" deb atadi.

SHuningdek, IBA prezidentining malum qilishicha, World Boxing turnirlarida sovrinli o'rinlarni egallagan bokschilar IBA jahon chempionatiga saralash imkoniyatiga ega bo'ladi. Olimpiada chempionlari va sovrindorlari esa IBA reytingiga kiritilib, jahon chempionatida saralashsiz qatnashishi mumkin.