“Ichan qala” bo'ylab sog'lom hayot uchun 5000 qadam FOTOREPORTAJ

O'zbekiston Respublikasi Jismoniy tarbiya va sport vazirining 2020 yil 9 iyundagi “COVID-19 pandemiyasi davrida hududlarda sport turlari bo'yicha mashg'ulotlar, musobaqalar hamda o'quv-mashg'ulot yig'inlarini tashkil etish to'g'risida”gi buyrug'iga asosan, Xorazm viloyatida sanitariya qoida va meyorlariga rioya qilingan holda tegishli ishlar amalga oshirilayotir. 

Jumladan, Xiva shahrida “Sog'lom hayot uchun 5000 qadam” shiori ostida piyoda yurish bo'yicha uyushtirilgan marafon ham ana shular sirasiga kiradi.

Tabir joizki, Xorazm  viloyati Jismoniy tarbiya va sport boshqarmasi tomonidan uyushtirilgan  mazkur tadbir ertalabki badantarbiya mashg'uloti bilan boshlandi. Qadimiy shaharning memorchilik yodgorligi – “Ota darvoza” oldida tashkil etilgan badantarbiya mashqlarini sport faxriylari va sportsevarlar faollik bilan bajarib, salomatliklarini yanada mustahkamlashdi.

So'ngra, tadbir ishtirokchilari birgalikda “Ochiq osmon ostidagi muzey-shahar” tarifini olgan Xivaning “Ichan qala” davlat muzey qo'riqxonasi bo'ylab belgilangan masofani bayramona ko'tarinkilik va xush kayfiyatda bosib o'tishdi. Bu bilan ular piyoda yurishning foydasini, sog'lom turmush tarzini targ'ibot qilishib, jismoniy tarbiya va sport bilan hamnafas ekanligini isbotlashdi.

Ikrom XUDOYBERGANOV tayyorladi (Xiva, Xorazm)