Ikki dzyudochimiz Abu-Dabi "Katta Dubulg'a" turniri bronza medali uchun tatamiga chiqadi

Mukofot jamg'armasi 154 000 evroni tashkil qiluvchi musobaqaning bugungi dasturida 8 nafar dzyudochimiz bahslarga kirishgandi. Ulardan ikki nafari kechki final dasturida bronza medali uchun tatamiga chiqadigan bo'ldi. 

Nurbek Murtozoev (-90 kg) ilk davrada filippinlik Ken Dakasinni, ikkinchi bosqichda franciyalik Loris Tassierni, 1/4 finalda vengriyalik Peter Safranini mag'lubiyatga uchratdi. Yarim finalda IJF bayrog'i ostida kurashayotgan rossiyalik Mansur Lorsanovga yutqazib qo'ydi. Endi u bronza medali uchun braziliyalik Jovani Ferreyraga qarshi bahs olib boradi.    

O'tkirbek To'raboev (+100 kg) esa qozog'istonlik Madi Edilbaevni engdi. CHorak finalda niderlandiyalik tajribali Yelle Snippega yutqazib qo'ydi. Bronza medali yo'lidagi o'tish bellashuvida serbiyalik Igor Vrachardan ustun keldi. O'tkirbek kechki dasturda rossiyalik taniqli dzyudochi Tamerlan Bashaevga qarshi tatamiga chiqadi.   

Qolgan dzyudochilarimiz Jaloliddin Qurbonmurodov (-90 kg), Zufarbek O'rolov va Ernazar Sarsenbaev (ikkalasi ham -100 kg), Muhammadqodir Mansurov (+100 kg) saralash bahslarida, Fotima Quramboeva va Durdona Nizomaddinova (+78 kg) bronza yo'lidagi o'tish bellashuvida raqiblariga imkoniyatni boy berishdi. 

Eslatib o'tamiz, hozircha musobaqaning birinchi kuni Muhriddin Tilovov tomonidan qo'lga kiritilgan bronza medali yagonaligini saqlab turibdi.