Ikki kurashchimiz Osiyo chempionati finalida, yana ikkisi bronza uchun kurashadi

Bugun erkin kurash bo'yicha musobaqa boshlandi. Biroz avval saralash bellashuvlari yakunlanib, kechki dasturda medallar uchun gilamga chiqadigan kurashchilar nomi malum bo'ldi. Ular orasida O'zbekiston terma jamoasi azolari ham bo'ladi. 

Jumladan, -70 kg vaznda yurtimiz sharafini himoya qilayotgan Zafarbek Otaxonov finalga yo'l oldi. U avvaliga hindistonlik Mulyas Yadavni 10-0, 1/4 finalda yaponiyalik Yoshinosuke Aoyagini 3-1, 1/2 finalda iordaniyalik SHamail Isakovni 10-0 hisobida dog'da qoldirdi. Zafarbekning Osiyo chempionligi uchun kechadigan final bellashuvidagi raqibi Sanjar Dosjanov (Qozog'iston) bo'ladi. 

Tokio-2020 Olimpiadasi bronza medali sovrindori Bekzod Abdurahmonov (-79 kg) 1/4 finalda SHuhrat Bozorov (Tojikiston)ni 11-0, 1/2 finalda esa Dipak Dipak (Hindiston)ni 10-0 hisobida mag'lubiyatga uchratdi. Uning finaldagi raqibi Bolat Sakaev (Qozog'iston) bo'ladi.  

Qolgan ikki kurashchimiz Umidjon Jalolov (-65 kg) va Maxsud Veysalov (-97 kg) bronza medali uchun gilamga chiqadi. Buenos-Ayres-2018 o'smirlar Olimpiadasi chempioni Umidjon Jalolov 1/2 finalda mo'g'ulistonlik Tumur Ochir Tulgaga 2-5, Veysalov esa xitoylik Avusayiman Habilaga 0-10 hisobida yutqazib qo'ydi. 

Oltin medal uchun

-70 kg: Zafarbek Otaxonov - Sanjar Dosjanov (Qozog'iston)

-79 kg: Bekzod Abdurahmonov - Bolat Sakaev (Qozog'iston)

Bronza medali uchun 

-65 kg: Umidjon Jalolov - Ulukbek Joldoshbekov (Qirg'iziston)  

-97 kg: Mahsud Veysalov - Dipak Dipak (Hindiston)