Intervyu. SHahram G'iyosov final, "Ronalducha sakrash" va boshqalar haqida

- Assalomu alaykum SHahram. Olimpiadaning kumush medali muborak bo'lsin!
- Tabrik uchun katta rahmat! Fursatdan foydalanib, meni qo'llab-quvvatlab turgan barchaga o'z minnatdorchiligimni bildirib o'tmoqchiman.

- Final jangi haqida nima deya olasiz? Qozoq bokschisi nimani hisobiga g'alaba qozondi?
- Fikrimcha, unga ushbu jangda omad kulib boqdi :)

- Qo'lga kiritilgan medalni kimga bag'ishlaysiz?
- Avvalambor, meni oq yuvib, oq tarab voyaga etkazgan ota onamga. Qolaversa, butun Olimpiada davomida meni qo'llab-quvvatlab turgan yurtdoshlarimga bag'ishlayman. Ularga buning uchun katta rahmat aytib qolaman. Bu medal butun O'zbekistonniki. Istiqlolimizning 25 yilligi uchun sovg'a.

- Braziliyadagi Olimpiada davomida siz 5 ta jang o'tkazdingiz. Ular orasida amaldagi Olimpiada va jahon chempionlari ham bo'lgandi. SHularni hisobga olgan holda aytingchi, ushbu janglar orasidagi eng qiyini qaysi bo'ldi?
- Ushbu janglar orasida Olimpiada chempioni Raniel Iglesias va litvalik Staniosisga qarshi janglar qiyinroq bo'ldi. SHukrki, janglarda yurtdoshlarimni uyaltirib qo'ymadim.

- Ana endi "Ronalducha sakrash" haqida aytib o'tmasangiz bo'lmaydi. Bu fikr qaerdan keldi?  G'alabani avval ham shunday nishonlaganmisiz?
- Bungacha agar g'alaba qozonib yarim finalga chiqadigan bo'lsa g'alabani Ronalduga o'xshab nishonlayman deb niyat qilib qo'ygandim.


- Bu "Real" jamoasining muxlisi ekanligingiz sababmi yoki Ronalduning?
- Ronalduning muxlisiman. Portugaliyalik futbolchining maydondagi harakatlarini kuzatish juda yoqadi.

- Endi qachon O'zbekistonga qaytasizlar?
- Kelasi hafta nasib qilsa yurtimizga qaytib ketamiz.

- Tushunarli. Yana bir marotaba ushbu muvaffaqiyat bilan tabriklaymiz.
- Rahmat katta. Etibor uchun barchaga minnatdorchilik bildirib qolaman.

Aziz To'xtamurodov suhbatlashdi