Islom birdamligi o'yinlaridagi medallarimiz soni 39 taga etdi, 11 tasi oltin + FOTO

Kechagi kungi bellashuvlarda sportchilarimiz jami 16 ta medal qo'lga kiritishdi. SHundan 6 tasi oltin, 4 tasi kumush, 6 tasi bronza medallaridir. Taekvondochimiz SHuhrat Salaev, erkin kurashchimiz Jahongirmirzo Turobov, balandlik sakrash sektorida 1.97 sm natija qayd etgan Safina Sadullaeva, bosqon uloqtiruvchimiz SHuhrat Xo'jaev, para engil atletika sport turining balandlikka sakrash bahslarida Omadbek Hasanov (1.90 sm) hamda velosportchimiz Olga Zabelinskaya kechagi bellashuvlarda O'zbekiston sport delegaciyasiga eng yuqori probali medalni taqdim etishdi. 

SHu tariqa, O'zbekiston terma jamoasi bugungi kun bahslari oldidan 56 davlat ishtirok etayotgan musobaqada 11 ta oltin, 10 ta kumush, 18 ta bronza, jami 39 ta medal bilan umumjamoa hisobida 3-o'ringa ko'tarilib oldi. 

Turkiya terma jamoasi hamon katta farq bilan peshqadamlik qilyapti. Mezbonlar 34 ta oltin, 30 ta kumush, 25 ta bronza, jami 89 ta medalni qo'lga kiritib ulgurishdi. Eron 15 ta oltin, 14 ta kumush, 10 ta bronza medali bilan 2-o'rinda bormoqda. O'zbekiston kuchli uchlikka yakun yasagan bo'lsa, Ozarbayjon 7 ta oltin, 10 ta kumush, 8 ta bronza medali bilan 4-o'rinni band etgan. Hisobida 6 ta oltin, 4 ta kumush, 15 ta bronza medali bo'lgan Qozog'iston 3-o'rindan 6-pog'onaga tushib ketdi.