Jaloldinov Jahon chempionati kumush medali sovrindori, Ulug'bek Rashitov bugun oltin uchun gilamga chiqadi

Dunyo birinchiligining navbatdagi kuni erkin kurashchilar o'zaro bellashishdi. Kechagi kun O'zbekiston terma jamoasi uchun omadli keldi. -55 kg vazn toifasida yurtimiz sharafini himoya qilgan erkin kurashchimiz Abdumalik Jaloldinov jahon chempionatining kumush medaliga sazovor bo'ldi. Finalgacha mag'lubiyatsiz etib kelgan Abdumalik oltin medal uchun kechgan murosasiz bellashuvda yaponiyalik Jinnosuke Okonogiga bir ochko farqi bilan 4:5 hisobida imkoniyatni boy berib qo'ydi. 

Kechagi saralash bahslaridan muvaffaqiyatli o'tib olgan erkin kurashchilarimiz bugun medallar uchun gilamga chiqishadi. -51 kg vazndagi polvonimiz Ulug'bek Rashitov finalda AQSH vakili Samuel Sanchezga qarshi oltin medal uchun bahs olib boradi. Yana ikki kurashchimiz Mirjalol Mukammilov (-45 kg) va Farruhbek Jumanazarov (-71 kg) bronza medali uchun kurashadi. Ularning raqiblari o'tish bellashuvida aniqlanadi. 

Jahon chempionati medallari uchun kechadigan bugungi bellashuvlar bizning vaqt bilan soat 19:00da boshlanadi.