Jangi bekor bo'lgan Emelyanenkoga yangi raqiblar taklif etildi

Ural FC ligasida o'tkazilishi kutilgan ushbu revansh jangi Dacikning jarohati sabab bekor qilingandi. Emelyanenkoning menejeri Nikita Burchakning xabar berishicha, Dacikning o'rniga boshqa raqib topilgan. 

"Bizda Ural FC ligasi bilan o'ziga xos kelishuvimiz bor. Yani, bu kabi holatlarda boshqa ligalarda ham jang o'tkaza olamiz. Bizda variantlar etarli - Aleksey Oleynik, Vitaliy Minakov. Ular katta nom va munosib raqiblar. Men Aleksandr bilan gaplashdim, u ACA ligasi chempioni Evgeniy Goncharov bilan jang qilishga qarshi emas. IBA professional boks bo'yicha ajoyib oqshomlarni o'tkazyapti. Balki, Emelyanenko o'zini boks qoidalari asosidagi jangda sinab ko'rar. Variantlar va g'oyalar bisyor. Vaziyatni kuzatishda davom etamiz", - deya MATCH TV kanaliga intervyu bergan Burchak. 

Kuni kecha Ural FC ligasi rasman 12 aprel kuniga belgilangan turnirni bekor qilgandi. Oqshomning markaziy jangida aynan Emelyanenko va Dacik o'zaro revansh bahsida to'qnash kelishlari kerak edi. Tashkilotchilar Moskva Ichki ishlar boshqarmasi bilan Ural FC 7 turnirini o'tkazish bo'yicha kelisha olmagan. Aniqrog'i, mamlakatda, xususan poytaxt Moskvada terroristik huruj ehtimolining saqlanib qolayotgani bois, Boshqarma turnir o'tkazishga ruxsat bermagan.