Jek Ketterol nima uchun SHahram G'iyosov bilan jangga rozi bo'lganini ochiqladi

Oqshom doirasida yarim o'rta vazn toifasida vaqtinchalik WBA chempionlik kamari uchun ham jang tashkil qilinadi va unda hamyurtimiz SHahram G'iyosov britaniyalik Jek Ketterolga qarshi ringga ko'tariladi. Jek nima uchun ushbu jangga rozi bo'lgani, majburiy davogar bo'lgan Devin Xeyni bilan uchrashish imkoniyatini kutmaganini tushuntirdi.

Ketterolning so'zlariga ko'ra, G'iyosovga qarshi jang taklifini qabul qilishda u o'zining birinchi yarim o'rta vazn toifasidagi tajribasini hisobga olgan. Bu divizionda u uch yildan oshiq vaqt davomida majburiy davogar maqomida bo'lgan. 

"Bu mening hayotimdagi psixologik jihatdan eng og'ir davr edi, - dedi ingliz The Ring nashriga bergan intervyusida o'sha davrni eslab. - Ammo men uchun taklif qilingan har qanday jang boshqa imkoniyatdan voz kechish uchun jiddiy asos bo'lishi kerak va bu variant aynan shunday. Muddatidan sakkiz-o'n hafta oldin menga taklif qilingan katta boks kechasida WBA chempionligi uchun jang. Men bu imkoniyatdan voz kechmoqchi emasman... 32 yoshdaman va istalgan raqib bilan jang qilishga tayyorman. Xeyni istamayaptimi — unda menga SHahramni beringlar deb aytganman".

Malumot uchun, Jek Ketterol prof boksdagi faoliyatida 32 g'alaba (14 nokaut) va 2 mag'lubiyat qayd etgan. SHahram G'iyosov esa 17 ta jangining barchasida zafar quchgan. Ushbu janglarining 10 tasini muddatidan avval yakunlangan.