Joylarda Yoshlar kubogi musobaqalari qizg'in davom etmoqda

O'zbekiston Jismoniy tarbiya va sport vazirligi tashabbusi bilan mamlakatimizning «yashil» hududlarida «Yoshlar oyligi» doirasida sportning stol tennisi, mini futbol, voleybol va badminton turlari bo'yicha «Yoshlar kubogi» musobaqalari bo'lib o'tmoqda.

Qoraqalpog'iston Respublikasi Jismoniy tarbiya va sport vazirligi hamda viloyatlar jismoniy tarbiya va sport boshqarmalari tomonidan tashkil etilgan mazkur musobaqalar karantin qoidalari asosida ochiq sport maydonlarida ijtimoiy masofa saqlangan hamda tashrif buyuruvchilar soni cheklangan holda o'tkazilyapti.

Jumladan, Qarshi shahrida viloyat sport o'yinlari va engil atletika sport turlariga ixtisoslashtirilgan bolalar-o'smirlar sport maktabi bazasida o'tkazilgan musobaqalarda 150 nafarga yaqin sportchi ishtirok etdi.

Farg'ona viloyatining Bag'dod tumanida esa tuman jismoniy tarbiya va sport bo'limi hamda bolalar va o'smirlar sport maktabi hamkorligida mahallalarda istiqomat qiluvchi uyushgan va uyushmagan yoshlar hamda BO'SM o'quvchilari o'rtasida engil atletika, mini futbol, voleybol sport turlari bo'yicha musobaqalar hamda ommaviy yugurish marafoni o'tkazildi.