"Katta Dubulg'a". O'razboev va Tilovov g'alabali yurishni davom ettirmoqda

Musobaqada -66 kg vaznli dzyudochilar o'rtasida davom etayotgan bahslarda vatanimiz sharafini ikki nafar sportchilarimiz - Muxriddin Tilovov va Diyorbek O'razboev himoya qilmoqda. Muxriddin ilk davrada Serbiya vakili Straxinya Bunchichni mag'lub etdi, ikkinchi davrada esa sloveniyalik Adrian Gomboshdan ustun keldi. Endi hamyurtimiz uchinchi davrada Germaniya vakili Sebastian Seidlga qarshi tatamiga chiqadi. 

Ushbu vaznda ilk davradan ozod bo'lgan ikkinchi vakilimiz Diyorbek O'razboev ilk bahsini Dmitriy SHershanga qarshi o'tkazib, g'alaba qozondi. Endi vatandoshimiz keyingi bosqichda Bolgariya vakili Bojidar Temelkovga qarshi to'qnash keladi.

Ayollar o'rtasida -52 kg vazn toifasida bahslarda qatnashgan Diyora Keldiyorova ilk davrada mo'g'ulistonlik Sosorbaram Lagvasurenga imkoniyatni boy berdi.