Konor Makgregorning UFC`ga qaytish muddati aytildi

Liga rahbarlari irlandiyalik bilan kelishuvga erishishga yaqin turibdi, deb xabar berdi taniqli sport sharhlovchisi Ariel Xelvani.

"UFC hozir Konor Makgregorga har qachongidan ham ko'proq muhtoj va ular uning qaytishi uchun barcha imkoniyatlarni ishga solishlari kerak. Hamma narsa to'g'ri yo'nalishda harakatlanayotganga o'xshaydi.

Hozirgi bosqichda aytish mumkinki, agar u 11 iyul kuni jangga chiqmasa, demak, jiddiy nimadir sodir bo'lgan", - deb yozdi jurnalist ijtimoiy tarmoqda.

Xelvanining so'zlariga ko'ra, ushbu malumotning bilvosita tasdig'i Maks Xolloueyning bayonoti bo'lib, u irlandiyalik jangchidan revansh olishga tayyorligini malum qilgan.

"Menimcha, o'tgan dam olish kunlari Maks Xolloueyning so'zlari o'z-o'zidan malum bo'ldi. Maks juda aqlli yigit, agar u shu yo'l bilan bizga nimanidir shama qilmoqchi bo'lgan bo'lsa, ajablanmayman", - deya qo'shimcha qildi muxbir.

Tashkilot 11 iyul kuni Las-Vegasdagi ananaviy Xalqaro janglar haftaligini yakunlovchi UFC 330 turnirini o'tkazishni rejalashtirgan. Aynan shu oqshomda Konorning oktagonga chiqishi kutilmoqda.