Konor qo'lqopsiz janglarga (bare-knuckle) o'tishni rejalashtiryapti

Feldmann Konor Makgregor bilan uning UFC`dagi shartnomasi yakunlangach, tashkilotdagi ehtimoliy debyuti bo'yicha muzokaralar olib borayotganini malum qildi. BKFC hammuassisi bo'lgan irlandiyalik avvalroq qo'lqopsiz janglarda albatta ishtirok etishi va ushbu yo'nalishda chempionlik kamarini qo'lga kiritishini vada qilgan edi.

"Bizda o'tmishda shunday suhbatlar bo'lgan, — dedi Feldman MMA Fighting nashriga bergan intervyusida. — Hozir u [UFC`dagi] so'nggi jangini o'tkazishga maksimal darajada etibor qaratgan. Keyin u bizga keladi va stadiondagi barcha chiptalar sotilib ketadi".

Maks Xollouey bilan yaqinda bo'lib o'tgan muvaffaqiyatsiz revansh jangidan so'ng (o'sha jangda Makgregor ilk soniyalardayoq tizzasidan jarohat olgan edi), uning UFC bilan shartnomasida atigi bitta jang qoldi. Irlandiyalik jangchi uni kelasi yilning iyul oyida o'tkazish niyatida.

Makgregorning o'zi ham avvalroq BKFC`da chiqish qilish niyatini bildirgan edi. "Agar siz men bu erda nutq so'zlab, odamlarni janglarga boshlab, o'zim esa ringga chiqmayman deb o'ylasangiz, yana bir bor o'ylab ko'ring, — degandi u o'tgan yili. — Ishonch hosil qiling, Konor Makgregor Bare Knuckle Fighting Championship`da jang qiladi. So'zlarimni eslab qoling. Men bu tashkilotda jahon chempioni bo'lmoqchiman. Bu faoliyatimdagi muhim kamar bo'ladi. Boks yoki MMA`dagi hech kim qo'lqopsiz janglar bo'yicha jahon chempioni haqida yomon gapira olmaydi".

Feldmanning fikricha, agar Makgregor BKFC jangchisiga aylansa, bu kompaniya qiymatini ikki yoki uch barobar oshirishi mumkin, bunga esa hammuassis sifatida Konorning o'zi ham bevosita manfaatdor.