Konya-2021. Barakali kun - kecha 12 ta medal qo'lga kiritildi + FOTOGALEREYA

Kechagi kun bellashuvlari O'zbekiston sport delegaciyasi uchun barakali bo'ldi. Sportchilarimiz murosasiz kechgan bahslarda jami 12 ta medalni qo'lga kiritishdi. Tokio Olimpiadasi chempioni Ulug'bek Rashitov taekvondo, G'ulomjon Abdullaev esa erkin kurash musobaqasida shohsupaning eng yuqori pog'onasiga ko'tarildi. Ular sharafiga O'zbekiston madhiyasi yangrab, bayrog'imiz baland ko'tarildi. 

Rasuljon Abdurahimov, Abdulla Azimov va Habibullo Ergashevdan iborat sport gimnastikachilarimiz jamoaviy bahslarda kumush medalga sazovor bo'lishdi. Abdurahimov yakkalik ko'pkurash musobaqasida bronza medalini qo'lga kiritdi. Para suzish musobaqasida qahramonga aylangan Azizbek Boynazarov bu safar kumush medalga ega chiqdi. Bu uning V Islom birdamligi o'yinlaridagi to'rtinchi medali bo'ldi: 2 ta oltin, 1 ta kumush, 1 ta bronza.   

SHu tariqa, O'zbekiston terma jamoasi bugungi kun bahslari oldidan 56 davlat ishtirok etayotgan musobaqada 5 ta oltin, 6 ta kumush, 12 ta bronza, jami 23 ta medal bilan umumjamoa hisobida 4-o'rinni egallab turibdi. 

Turkiya terma jamoasi hamon katta farq bilan peshqadamlik qilyapti. Mezbonlar 22 ta oltin, 18 ta kumush, 14 ta bronza, jami 54 ta medalni qo'lga kiritib ulgurishdi. Eron 8 ta oltin, 12 ta kumush, 7 ta bronza medali bilan 2-o'ringa ko'tarilib oldi. Qozog'iston delegaciyasi esa 6 ta oltin, 1 ta kumush, 8 ta bronza medali bilan kuchli uchlikka yakun yasagan.