Kopilov UFC 302 turnirida engilmas jangchiga qarshi oktagonga chiqadi

Tashkilotchilar tomonidan ushbu oqshomning yana bir jangi elon qilindi. Unga ko'ra, rossiyalik o'rta vazn toifasi vakili Roman Kopilov braziliyalik mag'lubiyat nimaligini bilmay kelayotgan Sezar Almeydaga qarshi oktagonga ko'tariladi.

Roman shu yilning fevral oyida o'zining 4 ta g'alabali seriyasiga chek qo'ygandi. O'shanda Entoni Ernandes ikkinchi raundda Kopilovni bo'g'ib qo'ygandi. Ungacha 32 yoshli Roman Alessio Di Kiriko, Punaxili Soriano, Klaudio Ribeyro va Josh Fremdni nokaut evaziga mag'lub etgan edi.

Braziliyalik 36 yoshli Sezar Almeyda esa UFC promousheniga Dana White's Contender Series saralash turniri orqali kelgan. U yakshanba tongida tashkilotdagi debyut jangini o'tkazib, ikkinchi raundda Dilan Budkani texnik nokautga uchratgandi. Unga qadar MMAdagi qolgan janglarida ham zafar quchgan.