Koreyaliklar Tel-Avivda birinchi bo'lishdi, biznikilar o'tgan yilgi natijani yaxshilashdi

Yilning dastlabki IJF turnirida dunyoning 5 qitasi 83 davlatidan dzyudochilar ishtirok etdi. Yakunda koreyaliklar medallar jamg'arish bo'yicha 3ta oltin, 3ta kumush, 2ta bronza, jami 8ta medal bilan umumjamoa hisobida birinchi o'rinni band etishdi. Ikkinchi o'rinni yaponiyalik dzyudochilar egallashdi. Dzyudo vatani vakillari 2tadan oltin va bronza medalini qo'lga kiritishgan. Kuchli uchlikka mezbonlar yakun yasab berishdi. Isroil terma jamoasi 2ta oltin va bitta bronza medaliga ega chiqdi.

Buyuk Britaniya 2ta, Sloveniya, Franciya, Rossiya, Italiya va Avstraliya terma jamoalari esa bittadan oltin medal bilan uyga qaytishdi. Jami 29 mamlakat delegaciyasi kamida bitta bronza medaliga sazovor bo'lishdi. 

Xabar berganimizdek, Tel-Aviv Gran-prisida O'zbekiston terma jamoasining 13 nafar dzyudochisi ishtirok etdi. Hamyurtlarimizdan Gulnoza Matniyazova (-78 kg), Davlat Bobonov (-90 kg) va Bekmurod Oltiboev (+100 kg) kuchli beshlikdan joy olish barobarida Tokio-2020 Olimpiadasi yo'lidagi qimmatli 252 ochkoni o'z hisoblariga qo'shib qo'yishdi. O'tgan yilgi Tel-Aviv Gran-prisida bizda bittagina beshinchi o'rin bo'lgan edi.