Kutganmidingiz? Toshkent yana bir nufuzli katta tennis musobaqasiga mezbonlik qiladi!

Ha, ko'pchilik tennis ihlosmandlari "Devis Kubogi"da AQSHga qarshi o'tkazilgan o'yinlardan so'ng kamida bir yoki ikki yilga katta tennis o'yinlaridan (mezbonlikdagi) mosuvo bo'ldik, deb o'ylagani aniq.

Ammo, unday emas. Toshkent yana bir nufuzli musobaqaga mezbonlik qiladi. 11-15 aprel kunlari poytaxtimizda joylashgan Tennisga ixtisoslashgan Olimpiya maktabi xard kortlarida Billie Jean King kubogining Osiyo va Okeaniya birinchi guruhidan o'rin olgan o'yinlar o'tkaziladi.

Ayollar o'rtasida o'tadigan ushbu musobaqaning O'zbekiston terma jamoasi o'rin olgan — Osiyo va Okeaniya birinchi guruhida bizga Xitoy, Hindiston, Yaponiya, Janubiy Koreya va Tailand raqiblik qiladi. Ushbu oltilalik guruhda birinchi va ikkinchi o'rinni qo'lga kiritgan jamolar pley-offga, so'nggi ikkita o'rindagi jamoalar esa ikkinchi guruhga tushadi.

Toshkentga keluvchi terma jamoalarning tarkiblari ham malum bo'lib ulgurgan, ammo negadir ushbu musobaqaning hatto o'tkazilishi haqida O'zbekiston tennis federaciyasi haligacha og'iz ochgani yo'q. Vaholanki, musobaqa startiga bir oydan kam vaqt qoldi.


O'zbekiston ayollar termasi mazkur musobaqada quyidagi tarkibda ishtirok etishi aytilgan:

Nigina Abduraimova (1994, WTA-175)
Oqgul Omonmurodova (1984)
Sevil Yuldasheva (2002, WTA-992)
Maftunabonu Qahramonova (2005).

Jamoa sardori — Oqgul Omanmurodova.


O'zbekiston ayollar terma jamoasi o'tgan yili mazkur musobaqaning Osiyo va Okeaniya ikkinchi guruhida ishtirok etib, birinchi o'rinni qo'lga kiritgan edi. Pley-offda Mo'g'ulistonni enggan raketkalarimiz o'shanda birinchi guruh yo'llanmasini qo'lga kiritgan edi.

Ayni damda jamoamiz Billie Jean King reytingida 122 terma orasida 39-o'rinni egallab turibdi. Ushbu turnir orqali o'z o'rnimizni yanada yaxshilab olish imkoniyati mavjud.

Termamiz mazkur musobaqada 15-marta ishtirok etmoqda. Ushbu turnirda ilk bor 1995 yilda kortga chiqqan hamyurtlarimizning eng yaxshi ishtiroki 2008 yilga to'g'ri keladi. O'shanda tennischilarimiz ikkinchi jahon guruhining pley-off bahslarigacha etib borishgan edi.

Tarkiblarni ko'rib, ochig'i autsayderlardan ekanimizni payqash qiyin emas. Ammo, ayollar o'rtasidagi tennisimizda yana bir yosh avlod etishib chiqayotgani, ularni ilk bor katta sinov kutayotganini ko'rish ham qiziq.

Qisqasi, ketma-ket ikkinchi oyda ham o'zbekistonlik tennis muxlislari zerikib qolmasliklari tayin.

Diyor Mavlonov