Las-Vegasda kutilmagan natija! Tim Czyu bo'ydor Fundoraga yutqazdi

Oqshomning markaziy jangi birinchi o'rta vazn toifasida o'tkazilib, unda WBO yo'nalishi chempioni, avstraliyalik Tim Czyu (24-1, 17 KO) amerikalik davogar Sebastyan Fundora (21-1-1, 13 KO)ga qarshi ringga ko'tarildi. O'n ikki raundga mo'ljallangan jang to'liq davom etdi. 

Czyudan bo'yi deyarli ikki qarich baland bo'lgan Fundora qonli kechgan jang yakunida hakamlarning ayri qarori bilan g'alaba qozonib, kunning kutilmagan natijasi muallifiga aylandi. Hakamlardan biri 116-112 hisobidagi g'alabani Czyuga taqdim etdi. Qolgan ikki hakam esa 116-112 va 115-113 hisoblarida Fundora g'alaba qozondi deb hisoblanadi.

Fundora faoliyatidagi 23-jangiga kelib, ilk bor chempionlik uchun ringga chiqdi va biryo'la ikkita kamarni qo'lga kiritdi. Sebastyan Czyuning WBO kamaridan tashqari ushbu vaznda vakant bo'lib turgan WBC chempionlik kamariga ham ega chiqdi.    

Eslatib o'tamiz, 26 yoshli Sebastyan Fundora jarohat sabab safdan chiqqan amerikalik Kit Turmanning o'rnini egallagandi. Birinchi o'rta vazn toifasida WBA chempionlik kamari Isroil Madrimovga tegishli bo'lib turibdi. Balki, hamyurtimiz keyingi jangini Fundoraga qarshi o'tkazar? Bu holatga jarohatidan forig' bo'lib qaytadigan Kit Turman halal berishi mumkin.