Malaka oshirish markazida sport tadbirlari o'tkazildi FOTOGALEREYA

Unda markaz xodimlari, professor-o'qituvchilari va tinglovchilari stol tennisi, armrestling, engil atletika, arqon tortish va shaxmat-shashka bo'yicha tashkil etilgan sport bellashuvlarida ishtirok etishdi.  

O'zbekiston Respublikasi Prezidentining 2017 yil 3 iyundagi “Jismoniy tarbiya va ommaviy sportni yanada rivojlantirish chora-tadbirlari to'g'risida”gi PQ-3031 – sonli qorari hamda davlatimiz rahbari tomonidan ilgari surilgan 5 ta muhim tashabbusning ikkinchi tashabbusi ijrosini taminlash orqali sog'lom turmush tarzini shakllantirish, ommaviylikka keng etibor qaratish maqsad qilingan mazkur musobaqa o'ziga xos sport bayramiga aylanib ketdi.

Dastlab, bellashuvning ochilish marosimi tashkil etildi. Unda so'z olgan markaz direktori Ilhom Tursunaliev va boshqalar  bugun mamlakatimizda jismoniy tarbiya va sportga, jumladan ommaviy sportga qaratilayotgan yuksak etibor haqida, o'tkazilayotgan ushbu sport tadbirlari ham sog'lom turmush tarzining targ'iboti  sifatida ko'rish mumkin ekanligi haqida takidlab o'tishdi.

SHundan so'ng musobaqalarga start berildi. Yo'nalishlar bo'yicha guruhlarga bo'lingan erkaklar va ayollardan iborat jamoalar  yuqorida qayd etilgan sport turlari bo'yicha g'oliblik uchun bor mahoratlarini ishga solishdi. Markazning sport boshqaruvi kafedrasi mudiri Ahmadjon Alimov hamda o'qituvchisi Ziyodulla Xadiyatullaevlar boshchiligidagi hakamlar guruhi esa natijalarni qayd etib borishdi. Yuqori kayfiyat bag'ishlagan, murosasiz va qiziqarli o'tgan bahslar yakunida g'olib va sovrindor  jamoalar markaz tomonidan diplom va esdalik sovg'alari bilan mukofotlanishdi. 

- Ananaga aylangan ushbu bellashuvlar dastlab guruhlar o'rtasida o'tkazilib, final bosqichi g'oliblari har oyning uchinchi o'n kunligining oxirida aniqlanadi, - deydi kafedra mudiri Ahmadjon Alimov. - SHuningdek, tinglovchilarimizning jismoniy holatini aniqlash maqsadida ular markazimizga tinglovchi sifatida kelgan ilk kunlarida “Alpomish va Barchinoy” test-meyorlarini ham o'tkazamiz. Bundan tashqari sog'lom turmush tarzining asosiy talablaridan biri bo'lgan ertalabki badantarbiya mashg'ulotlariga ham alohida etibor qaratganmiz. Har kungi o'n daqiqalik badantarbiya mashg'ulotlarimizda barchaning birdek ishtiroki kun davomida xushkayfiyatda yurish uchun zamin bo'ladi.

Ilhom RAHMONOV tayyorladi