"Mard o'g'lon" - SHarofiddin Lutfullaevni tabriklaymiz!

SHarofiddin polvonlar yurti - Surxondaryo viloyatining Angor tumanida dunyoga kelgan. U avvaliga kurash, keyin esa dzyudo bilan shug'ullana boshlagan. Bugungi qahramonimizning sportni tanlashiga mehribon onajonisi sabab bo'lgan. Murabbiyi Surxondaryo viloyat dzyudo federaciyasi rahbari, shu bilan birga hozirda O'zbekiston dzyudo federaciyasi vice-prezidenti lavozimida ishlab kelayotgan Bekzod To'raboev hisoblanadi. SHarofiddinning erishgan yutuqlari va bugungi darajasiga chiqishida aynan Bekzod akaning xissasi hamda xizmati katta. 

O'tgan yilning sentyabr oyida SHarofiddin dzyudo vatani Yaponiyada o'tgan Jahon chempionatida kumush medalni qo'lga kiritdi. Lutfullaev o'sha musobaqadan so'ng Olimpiada reytingida birinchi o'ringa ko'tarilib oldi. SHarofiddinning yutuqlaridan yana biri 2013 yilda Abu-Dabi Gran-prisiga to'g'ri keladi. O'shanda yosh dzyudochimiz London-2012 Olimpiadasi chempioni, Rossiya terma jamoasiga 22 yillik tanaffusdan so'ng ilk oltin medalni taqdim etgan Arsen Galstyanni mag'lub eta olgandi. Arsen Olimpiadaning yarim finalida hamyurtimiz Rishod Sobirov, finalda esa yaponiyalik Xiroaki Xiraokadan ustun kelgandi.

Quvonarlisi, Mustaqilligimizning 29 yillik bayrami arafasida SHarofiddin Lutfullaev "Mard o'g'lon" davlat mukofotiga loyiq ko'rildi. Albatta, bu uning bir necha yillik mashaqqatli mehnati samarasi, mahsuli. 

Fursatdan foydalanib, O'zbekiston dzyudo federaciyasi rahbariyati, murabbiylar va sportchilar nomidan terma jamoamiz etakchisi, jahon chempionati sovrindori, Toshkent davlat iqtisodiyot universitetining 3-bosqich talabasi SHarofiddin Lutfullaevni bugungi shukrona kuni bilan muborakbod etamiz. Uning eng katta orzusi bu shubhasiz, Olimpiada chempioni bo'lish! Bu orzuni u aynan dzyudo vatanida o'tkaziladigan Olimpiadada ro'yobga chiqarmoqchi. Bu borada unga omad va zafar yor bo'lishini tilaymiz!