Markaziy stadionida "Olimpiya kuni"ga bag'ishlangan tadbir o'tkazildi

Ushbu marosim viloyatda Olimpiya harakatini rivojlantirish, Olimpiya turlarini keng targ'ib qilish, yoshlarni Olimpiya sport turlariga jalb etish, aholi o'rtasida sog'lom turmush tarzini targ'ib qilish ishlari samaradorligini yanada oshirish maqsadida tashkil etilyapti. 

Xabaringiz bor, 6 iyul kuni “Xalqaro olimpiya kuni”ga bag'ishlab Respublikamiz bo'ylab “Xalq sayli” umummilliy sport musobaqalari tashkil etiladi. Xususan, Qashqadaryo viloyatida ham ana shunday bir qator sport bayramlarining o'tkazilishi rejalashtirilgan bo'lib, dastlabkisi bugun "Nasaf" klubiga qarashli Markaziy stadionda o'tkazildi. 

“Xalq sayli” umummilliy sport musobaqalarining ochilish marosimi musiqa sadolari ostida tadbir ishtirokchilarning ertalabki badantarbiya mashg'ulotlarini bajarishdan boshlandi. SHundan so'ng ishtirokchilar tomonidan olimpiya xalqalarini aks etuvchi o'ziga xos fleshmob tashkil etildi. Ochilish marosimi ommaviy marafon musobaqasiga ulanib ketdi. O'tkazilgan tadbirlarda 10 000 nafarga yaqin aholi vakillari, sportchilar ishtirok etishdi.

“Xalqaro Olimpiya kuni” munosabati bilan viloyatning barcha tuman (shahar)larida “Sitius, Altius, Fortius”, “Olimpiya sari yo'l” shiorlari ostida turli sport musobaqalari, festivallar o'tkazilmoqda.

Ilhom Rahmonov tayyorladi