Milliy olimpiya qo'mitasi jahon chempionlarini taqdirladi

Ushbu tadbirda yaqinda Moskva shahrida mehribonlik uyi tarbiyalanuvchilari o'rtasida bo'lib o'tgan jahon chempionatida g'oliblikni qo'lga kiritgan yosh futbolchilarimiz, Milliy olimpiya qo'mitasi Bosh kotibi Jasur Matchanov, O'zbekiston futbol associaciyasi Bosh kotibi Sardor Rahmatullaev, Professional futbol ligasi direktori Omon G'ofurov, shuningdek, Toshkent kimyo-texnologiya instituti qoshidagi akademik licey o'quvchilari ishtirok etishdi.Tadbir davomida O'zbekiston Milliy olimpiya qo'mitasi Bosh kotibi Jasur Matchanov so'zga chiqib, yosh chempionlarimizga o'zining eng samimiy tilaklarini izxor etdi.
"Eng avvalo qo'lga kiritilgan ushbu g'alaba bilan yana bir marotaba tabriklayman. Ushbu g'alabadan barchamiz xursandmiz. Yurtimizda yaratilgan imkoniyatlar kengligidan mana shunday muvaffaqiyatlar qo'lga kiritilmoqda. Siz bugungi kun qahramonlarisiz. Tengdoshlaringiz sizlarga qarab yangi marralarga intiladilar. Kelajakda bundanda katta muvaffaqiyatlar tilab qolaman", - dedi Jasur Matchanov.

SHundan so'ng yosh chempionlarga Milliy olimpiya qo'mitasi sovg'alari - velosipedlar taqdim etildi.

Taqdirlash marosimidan so'ng "Bulbulcha" bolalar ashula va raqs guruhi o'zining chiqishi bilan yig'ilganlarning kayfiyatini hushnud etdi. So'ngra tadbir ishtirokchilari yosh chempionlarga o'zlarini qiziqtirgan savollar bilan murojat qilishdi.