Milliy olimpiya qo'mitasi OAV xodimlarini bayram bilan tabrikladi

Aynan ushbu soha vakillari sabab joylarda bo'lib o'tayotgan tadbirlar, amalga oshirilayotgan ishlar, yangiliklar, muvaffaqiyatlar va kamchiliklardan boxabar bo'lamiz. Ommaviy axborot vositalari xalqimiz hayotiga, uning quvonch va tashvishlariga tobora yaqin bo'lib, davlat va xalq orasidagi haqiqiy «ko'prik» vazifasini bajarmoqda. Hususan, sport rivoji yo'lida ham «to'rtinchi hokimiyat» vakillarining o'rni beqiyosdir.

27 iyun - Matbuot va ommaviy axborot vositalari kuni munosabati bilan O'zbekiston Milliy olimpiya qo'mitasi tomonidan qalam ahli uchun o'ziga xos tadbir tashkil etildi. Unda jurnalistikaning turli yo'nalishlarida, jumladan TV, gazeta, internet nashrlarida faoliyat olib borayotgan bir guruh ommaviy axborot vositasi xodimlari ishtirok etishdi.

Tadbirda Milliy olimpiya qo'mitasi prezidenti Umid Ahmadjonov ham ishtirok etdi va jurnalistlarni bayram bilan tabriklab, hamkorlikda ishlashga tayyor ekanligini aytib o'tdi.

«Assalomu alaykum Hurmatli jurnalistlar. Bugungi bayramingiz bilan chin ko'ngildan tabriklayman. Avvalambor, ijodiy faoliyatingizda omadlar tilamoqchiman. Olib borilayotgan islohotlarni aynan sizlar xalqqa etkazib berasizlar. Buning uchun katta rahmat. Milliy olimpiya qo'mitasi sizlar bilan hamkorlikda ishlashga tayyor.

Avgust oyida Indoneziyada bo'lib o'tadigan Osiyo o'yinlarida ham birgalikda faoliyat olib boramiz. Vaqt ajratib tadbirimizga tashrif buyurganingiz uchun rahmat. Yana bir marotaba bayramingiz muborak bo'lsin», – dedi Umid Ahmadjonov.

SHundan so'ng qalam ahliga Milliy olimpiya qo'mitasining esdalik sovg'alari topshirildi.