MOQ Bosh kotibi Tokio-2020 tashkiliy qo'mita vakillari bilan suhbatlashdi

Unga ko'ra, Tokio-2020 Olimpiya o'yinlari 2021 yil 23 iyul – 8 avgust kunlari bo'lib o'tadi. Muddati bir yilga o'zgartirilgan Tokio-2020 yozgi Olimpiya o'yinlari O'zbekiston Milliy Olimpiya qo'mitasining ham tayyorgarlik rejasini o'zgartirib yubordi. Lekin, qo'yilgan vazifa o'sha-o'sha.

O'zbekiston Respublikasi Prezidentining 2017 yil 9 martdagi “O'zbekiston Respublikasi sportchilarini 2020 yil Tokio shahrida (Yaponiya) bo'lib o'tadigan XXXII yozgi Olimpiya va XVI Paralimpiya o'yinlariga tayyorlash to'g'risida”gi PQ-2821-sonli qarori ijrosini taminlash shuningdek, Vazirlar Mahkamasining 15.10.2019 yildagi 01-14/1-2921 sonli 2020 yil Tokio shahri (Yaponiya)da bo'lib o'tadigan XXXII yozgi Olimpiya va XVI Paralimpiya o'yinlari davomida O'zbekiston delegaciyasini qo'llab-quvvatlash uchun muxlislarni jalb qilish va Tokio shahri (Yaponiya)da O'zbekiston kunini o'tkazish to'g'risidagi 11- Majlis bayonlarini bajarish maqsadida qator ishlar amalga oshirilmoqda.

Xususan, O'zbekiston Milliy Olimpiya qo'mitasi tashabbusi bilan Tokio-2020 Olimpiya o'yinlari tashkiliy qo'mitasi bilan videokonferenc majlis tashkil etildi. Uchrashuvda MOQ Bosh kotibi Oybek Kasimov, O'zbekistonning Yaponiyadagi favqulodda va muxtor elchisi G'ayratbek Fozilov, O'zbekiston Respublikasi Tashqi ishlar vazirligi va Tokio-2020 Olimpiya o'yinlari tashkiliy qo'mitasining masul xodimlari ishtirok etishdi.

Majlisda Olimpiada davrida delegaciyamiz vakillari, yurtimizdan boradigan tomoshabinlarga barcha qulayliklarni yaratish, Tokio shahrida ular uchun transport, oziq-ovqat va turar-joy masalalarini hal qilish kabi asosiy masalalar kun tartibidan o'rin oldi. Uchrashuv yakunida MOQ Bosh kotibi tashkiliy qo'mita vakillaridan yuqorida keltirib o'tilgan masalalarda amaliy yordam ko'rsatilishini so'radi. SHuningdek, O'zbekiston tomoni hamkorlik ishlarini doimo davom ettirishga tayyor ekanligini takidladi.