MOQ mutasaddilari XOQ rahbari bilan videomuloqotda bo'lishdi

Malumki, ayni vaqtda Xalqaro Olimpiya qo'mitasi koronavirus sabab kun sari yaqinlashib borayotgan Tokio-2020 yozgi Olimpiya va Paralimpiya o'yinlarini o'tkazish bo'yicha jiddiy muammolarga duch kelmoqda. 

Garchi tashkilot bo'lajak musobaqani qoldirmaslikka qaror qilgan bo'lsa ham, bunda Milliy olimpiya qo'mitalari va boshqa xalqaro tashkilotlarning qo'llab-quvvatlashishiga ehtiyoj sezadi. Kecha O'zbekiston Milliy olimpiya qo'mitasi mutasaddilari videomuloqot orqali Xalqaro Olimpiya qo'mitasi prezidenti Tomas Bax bilan suhbat o'tkazishdi. 

Suhbatda O'zbekiston tomonidan MOQ Bosh kotibi Oybek Kasimov, vice-prezident Azizjon Kamilov, MOQ prezidenti maslahatchisi SHerzod Asatullaev, xalqaro aloqalar departamenti direktori Kamoliddin Ergashev ishtirok etdi. SHubhasiz, mazkur muloqotning bosh mavzusi koronavirusning Tokio-2020 Olimpiya va Paralimpiya o'yinlariga tasiri bo'ldi. 

“Tokio-2020 Olimpiya o'yinlariga tayyorgarlik ko'rayotganlarning salomatligi va farovonligi bizning bosh maqsadimizdir. Atletlar, murabbiylar va muxlislarning xavfsizligi va manfaatlarini taminlash uchun barcha choralar ko'rilmoqda. Biz Olimpiya oilasimiz; Bir-birimizni yaxshi va yomon kunlarda qo'llab-quvvatlashimiz kerak. Ushbu Olimpiya hamjihatligi bizni yagona jamoa sifatida belgilaydi”, – dedi Xalqaro Olimpiya qo'mitasi prezidenti Tomas Bax.

Muloqot chog'ida Osiyo Olimpiya Kengashi (OOK) Bosh direktori doktor Huseyn Al Musallam ham mazkur voqelik yuzasidan o'z fikrlarini bildirib o'tdi.

“Osiyo Olimpiya Kengashi ham XOQ kabi bir xil yondashuv va siyosatga amal qiladi. SHuningdek, OOKga azo davlatlarning Tokio-2020 yozgi Olimpiya o'yinlarida muvaffaqiyatli qatnashishiga umid qilamiz. Biz XOQning qarorlarini qo'llab-quvvatlashga tayyormiz”, – dedi Huseyn Al Musallam.

Ushbu bayonot XOQ Ijroiya qo'mitasi, shuningdek, Osiyo mamlakatlarining Milliy olimpiya qo'mitalari tomonidan bir ovozdan maqullandi.