MOQ rahbari sport faxriylaridan maslahat so'radi

Ushbu uchrashuv sport faxriylari va MOQ prezidenti o'rtasida tashkil etildi. Unda tashkilot qoshida sport faxriylari, taniqli olimlar va arboblardan iborat Jamoatchilik Kengashini tuzish va ular bilan hamkorlikda ishlash borasida suhbat bordi.

Uchrashuvda Rustam SHoabdurahmonov sport faxriylarining sog'lom turmush tarzi va sport ommaviyligini oshirish borasida tutgan o'rni xususida to'xtalib o'tdi.

- Sizlar o'zbek sportining “Oltin genofondi” sanalasiz. MOQ qoshida tuziladigan Jamoatchilik Kengashi o'zbek sportini yangi bosqichga olib chiqishda katta yordam beradi. Biz sizning boy tajribangizdan foydalanishimiz kerak. Orangizda sportimiz taraqqiyotiga, uning bugungi zafarlariga tamal toshini qo'ygan mutaxassislar bor. Hozirda barcha sport federaciyalarida moddiy-texnik bazani yanada mustahkamlash borasida ish boshlayapmiz. Sizlardagi tajriba va ishtiyoq bilan sportimizning shonli tarixini qayta tiklaymiz.

Mazkur uchrashuvda boks, og'ir atletika, qilichbozlik, futbol, sport kurashlari, badiiy va sport gimnastikasi, shuningdek, ilmiy soha yo'nalishlarida shuhrat qozongan avlod vakillari qatorida suv polosi, chim ustida xokkey kabi sport turlarida Sobiq Ittifoq terma jamoasi bilan jahon chempionati, Olimpiya o'yinlarida muvaffaqiyatli qatnashgan sportimiz faxriylari ham qatnashdi.

Takidlash joiz, MOQda bo'lgan yig'ilishda poytaxtimizda istiqomat qilayotgan faxriylargina qatnashdi xolos. O'zbekiston Milliy olimpiya qo'mitasi kelgusida barcha hududlardagi sport faxriylari bilan ham izchil hamkorlikni yo'lga qo'yish, ularning ulkan tajribasidan sportimiz taraqqiyoti va Olimpiya harakati rivoji yo'lida foydalanishni maqsad qilgan.