MOQ rahbari yunon-rum kurashchilarimizning mashg'ulotini kuzatdi

MOQ raisi Rustam SHoabdurahmonov O'zbekiston Respublikasi Milliy gvardiyasi sport kurashlari bo'yicha ixtisoslashtirilgan olimpiya zaxiralari maktabiga tashrif buyurib, sportchilarimiz bilan suhbatlashdi. Uchrashuvda SHuhrat Mamadaliev boshchiligidagi O'zbekiston sport kurashlari associaciyasi mutasaddilari, terma jamoamiz murabbiylari ham ishtirok etishdi.

Ravshan Ro'ziqulov boshchiligidagi jamoamiz oldida bu yil ham katta masuliyat turibdi. Ayniqsa, Xanchjou shahrida bo'lib o'tadigan Osiyo o'yinlari, Belgradda o'tadigan jahon chempionatiga munosib tayyorgarlik ko'rish jamoa oldidagi asosiy vazifa. Rustam SHoabdurahmonov uchrashuvda bunga alohida ahamiyat qaratdi.

Qayd etish joiz, ushbu yig'inda Rio-2016 Olimpiya o'yinlari sovrindori, ko'p karra Osiyo chempioni Elmurat Tasmuradov murabbiy sifatida o'zining ilk qadamlarini tashlamoqda. Yosh sportchilarning esa tajribali atletdan o'rganadigan jihatlari ko'p. Uchrashuv davomida MOQ rahbari har bir sportchimiz bilan alohida suhbatlashib, ularning ijtimoiy muammolari, salomatligi haqida so'radi.

Yig'ilish yakunida Rustam SHoabdurahmonov hukumatimiz atletlarimizni har tomonlama qo'llab-quvvatlayotgani, musobaqalarga tayyorgarlik doirasida barcha sharoitlar yaratib berilishini takidladi.

Suratlar muallifi - Abdullo Fayzullaev