MOQ raisi Gran-pri oldidan kurashchilarimizga omad tiladi

Ushbu musobaqa klassik kurashchilarimiz uchun uzoq tanaffusdan keyingi ilk turnir bo'lib, licenzion musobaqaga asosiy tayyorgarlik bosqichi bo'lib xizmat qiladi.

MOQ raisi Rustam SHoabdurahmonov ZOOM platformasi orqali Zagrebda bo'lib turgan sportchi va murabbiylarimiz bilan onlayn muloqot qildi. Onlayn uchrashuvda shuningdek, MOQ raisi o'rinbosari SHerzod Tashmatov, O'zbekiston sport kurashlari associaciyasi va MOQ mutasaddi vakillari ishtirok etishdi.

“Sizlarni juda muhim start kutib turibdi. Ilohim, musobaqa jamoamiz uchun omadli va muvaffaqiyatli bo'lsin. Kurash muxlislari Sizlarning g'alabalaringizni anchadan beri sog'inib qolishgan. Musobaqada barchangizga omad va zafarlar yor bo'lsin”, – dedi MOQ raisi.

Onlayn muloqotda terma jamoa murabbiyi Ravshan Ro'ziqulov kurashchilarimizning kayfiyati va salomatliklari, oldindagi rejalar haqida gapirib o'tdi. O'z navbatida, Rustam SHoabdurahmonov jamoamizning Olimpiya o'yinlariga munosib tayyorlanishlari uchun hukumatimiz tomonidan barcha sharoitlar yaratib berilishi haqida takidladi.

Malumot uchun, Zagreb Gran-prisi 16-17 yanvar kunlari bo'lib o'tadi. Musobaqadan so'ng jamoamiz ushbu shaharda 14 kunlik o'quv-mashg'ulot yig'inida bo'lishadi. Hozirda “klassik” kurashchilarimiz hisobida Tokio Olimpiadasi uchun 3 ta yo'llanma mavjud.