Moskvadan eksklyuziv! SHohjahon endi oshpaz. Yigit kishiga qirq hunar ham oz FOTOREPORTAJ

Unda hamyurtlarimiz – kafe egasi, MS Doni taxallusi bilan ijod qiluvchi repper Dostonbek Islomov (Dostonbek ham yoshligida boks bilan jiddiy shug'ullangan) taklifiga ko'ra ayni damda Rossiya poytaxtida bo'lib turgan bokschimiz SHohjaxon Ergashev ishtirokida o'zbekona osh tayyorlash va shu bahona muxlislar bilan uchrashuv tashkil etildi. 

Tadbir boshlanishidan ancha oldin yig'ilishni boshlagan muxlislar soni bir zumda yuz nafardan oshib ketdi va ko'pchilik navbat kutib ko'chada ham turib qoldi.

SHohjahonning aytishicha, koronavirus pandemiyasi sababli butun dunyoda katta tadbirlar, sport musobaqalari tashkil etilishi ham cheklanganligi tufayli uning ham oldindan belgilab qo'yilgan rejalalari o'zgarib ketgan. Mana endi butun dunyoni larzaga solgan bu balo chekinishni boshlagach, u ham o'z faoliyatini yana davom ettirish va navbatdagi jangiga tayyorgarlik ko'rish uchun mashg'ulotlarga zo'r berishni boshlagan. 

Karantin paytida O'zbekistonda xordiq chiqarib, mashg'ulotlarini o'tkazgan bokschimiz tayyogarlikni bu haftadan Moskvada davom ettirmoqda. Rossiya poytaxtida bir oz muddat bo'lgach, u Amerika Qo'shma SHtatlariga jo'nab ketishni va navbatdagi jangga tayyorgarlikni okean ortida davom ettirishni rejalashtirmoqda.

Qisqa savol-javoblar bilan boshlangan tadbir bir zumda katta fotosessiyasga aylanib ketdi va uzoq davom etgan bu jarayondan keyin tadbirning yakuniy bosqichi boshlandi - MS Doni va SHohjahon birgalikda osh va kabob tayyorlashdi.

Moskva shahridan saytimiz uchun Akbar Yusupov tayyorladi