Murabbiy va dzyudochilarga xayfsan elon qilindi

Yig'ilish kun tartibida bir necha dzyudochilar va murabbiylar tomonidan tartib-intizom qoidalarining buzilganlik holati ko'rib chiqildi. Yani, dzyudochilarimizning bir necha nafari oqibatini o'ylamagan holda to'y kurashida ishtirok etishgan. Ularga murabbiylar ham hamrohlik qilgan. 

Xalqaro dzyudo federaciyasi (IJF) bu kabi holatlarni keskin qoralaydi. Dzyudodan boshqa kurash turlaridagi musobaqalarda ishtirok etish qatiyan man etiladi. Bu holat IJF sport va tashkiliy qoidalarining 4.1-moddasiga ko'ra jazoga tortiladi. Yani, jahon reytingida tasniflangan sportchi xalqaro dzyudo federaciyasidan ruxsat olinmagunga qadar dzyudodan boshqa har qanday kurash sport turidan xalqaro va boshqa musobaqalarda ishtirok eta olmaydi. 

Komissiya kelgusida yuqorida keltirilgan holatlar takrorlanmasligi, ruxsat etilmagan tadbirlarda qatnashilmasligining oldini olish maqsadida bir necha dzyudochi va trenerlarga intizomiy choralar qo'llanilishini malum qiladi. Dzyudochi boshqa sport turidagi musobaqalarda kutilmagan jarohat orttirib olishi va buning natijasida terma jamoani qiyin ahvolda qoldirishi mumkin. Hech kim jarohatlardan himoyalanmagan.

Yig'ilishda ko'rilgan masala federaciyaning viloyatlardagi bo'limlariga ham jo'natildi. Har bir hududiy bo'lim o'z sportchi va trenerlari bilan ushbu masalaning oqibatlari yuzasidan tushuntirish ishlarini olib boradi.