Murodjon Ahmadaliev boks tarixidagi rekordni takrorlashi mumkin

Keling, avvalo uning professional boksdagi ushbu janggacha bo'lgan yo'lini bir esga olsak. Murodjon Ahmadaliev ushbu janggacha 2018 yil 24 noyabr kuni prof ringdagi 5-jangida WBA reytingida 6-o'rinda borayotgan (Murodjon u vaqtda reytingda 3-o'rinda qayd etilgan edi) Aykaz Zaratani 9-raundda texnik nokautga uchratdi va WBA reytingida 1-o'ringa ko'tarilib, WBA chempionlik kamariga rasmiy davogarga aylandi.

Ammo chempion Daniel Roman IBF chempioni Ti Jey Doxenyga qarshi birlashtiruvchi jang bo'yicha kelishuvga erishgani uchun WBA tashkiloti istisno tariqasida himoya jangini kechroqqa qoldiradi. 2019 yilning 26 martida Daniel Roman shiddatli kechgan jangda TJ Doxenyni ochkolar bo'yicha mag'lub etib, ikki yo'nalish - WBA va IBF chempioniga aylanadi. Ayni shu kechada Murodjon Ahmadaliev ham prof boksdagi 6-jangini Karlos Karlsonga qarshi o'tkazib, 3-raundda raqibini nokautga uchratadi.

So'ngra Butunjahon Boks Associaciyasi Murodjon Ahmadaliev va Daniel Roman jangiga buyruq berdi. Tomonlar o'zaro kelishishi kerak edi. Ammo Daniel Roman jamoasi jangga hadeganda rozi bo'lavermadi. Oxir oqibat jang o'tkazish huquqini ochiq aukcionda Murodjon tarafdan "Mir Boksa" kompaniyasi 145 ming dollar evaziga sotib oladi va shu tariqa Ahmadaliev o'zining 7-jangidayoq WBA va IBF chempionlik kamari uchun ringga chiqadigan bo'ldi.

Tarixga nazar tashlaydigan bo'lsak, bunday kam sonli jang bilan ikki yo'nalish chempionlik kamarini qo'lga kiritgan bokschi bu Leon Spinks hisoblanadi. U 8-jangidayoq WBC va WBA kamarlari uchun afsonaviy Muhammad Aliga qarshi ringga chiqqan va 15 raundlik jangda (u vaqtda janglar 15 raundlik bo'lgan) ochkolar hisobida g'alabaga erishib, tarixiy va sensacion natijaga erishgan. Bu statistikani hozircha hech kim yangilamadi. 

Murodjon Ahmadalievda bu rekordni yangilash imkoni bor edi. Uning chempionlik jangi 2019 yilning 13 sentyabrida, 7-jangidayoq ikki yo'nalish chempionlik kamari uchun ringga ko'tarilishi kerak edi. Ammo, Romanning jarohati bois jang qoldirildi va "Kaka" Uilner Sotoga qarshi yana bir reyting jangi o'tkazdi.

Roman jarohatdan forig' bo'lgach, 30 yanvar kuni AQSHning Florida shtatidagi Mayami shahrida jang o'tkazish bo'yicha kelishuvga erishildi. Mana, jangga ham sanoqli kunlar qolmoqda. Agarda Ahmadaliev bo'lajak jangda g'alaba qozonsa, Spinksning tarixiy rekordini takrorlagan bo'ladi. Unga omad tilaymiz va O'zbekistonga biryo'la ikkita kamar bilan qaytishiga tilakdoshmiz.

Jalol Ahmedov tayyorladi (Jizzax, Forish)