Muzaffarbek To'raboev yangi vazn toifasida tatamiga chiqadi

Xalqaro dzyudo federaciyasi (IJF)ning rasmiy saytida hamyurtimiz, Parij-2024 yozgi Olimpiya o'yinlari sovrindori Muzaffarbek To'raboev +100 kg vazn toifasida ro'yxatdan o'tkazilgan. Xo'sh, Muzaffarbek endi boshqa vazn toifasida kurashadimi? MOQ matbuot xizmati sportchi bilan bog'lanib, bu savolga oydinlik kiritdi.

— IJF saytida siz Tokio “Katta Dubulg'a” turniri ishtirokchilari ro'yxatida turibsiz. Faqat yangi vazn toifasida. Haqiqatdan ham +100 kg toifasiga o'tdingizmi?

— Ha, ushbu musobaqada yangi vaznda ishtirok etaman. 5 dekabr kuni Tokioga uchib ketishni rejalashtirganmiz. Dasturga ko'ra, 8 dekabr kuni tatamiga chiqaman. Ko'rsatilganidek, Tokioda +100 kg vazn toifasida kurashaman.

— Bazi mutaxassislar Sizni yangi ciklda +100 kg da kurashadi deyapti. SHu to'g'rimi?

— Yo'q, yangi ciklda o'zimni vaznim (-100 kg)da qolaman. Hozir vazn tashlamayotganim uchun +100 kgda o'z imkoniyatimni sinab ko'rmoqchiman.

— Sizning sevimli usulingizni kelib chiqishi qanday? O'zingiz yoqtirib qo'llashni boshlaganmisiz yoki kimdir sizga shu mos tushadi deb qo'yib berganmi?

— Bu usulni vohamizning taniqli polvonlaridan bo'lgan otam o'rgatgan. Murabbiyim Ulug'bek aka Azizov bilan uni rivojlantirdik. Terma jamoa tarkibiga kirganimdan so'ng Nurali aka Qobulov va Ilias Iliadislar bilan usulni yanada ishlab, mana shunday ko'rinishga keltirdik. Uni mukammallashtirishda barcha murabbiylarning mehnati bor. Kuch – birlikda, deyilganidek, bunga ham ko'pchilikning birlashishi sabab bo'lgan.