Nadal keyingi yil faoliyatini yakunlamoqchi

“"Rolan Garros"da o'ynay olmayman. O'zingizga malumki, men so'nggi bir necha oy davomida har kuni juda qattiq ishladim, lekin Avstraliyada paydo bo'lgan muammoga echim topa olmadim. Bugun men "Rolan Garros"da o'zimga kerakli tennis standartini ko'rsatishga tayyor emasman.

Ikkinchidan, oxirgi bir necha yil natijalar bo'yicha juda yaxshi bo'ldi – bir nechta "Katta Dubulg'a" turnirlarida, bir qancha muhim turnirlarda g'olib chiqishga muvaffaq bo'ldim. Lekin ishim menga yoqmadi.

Pandemiyadan keyin tanam kundalik ishlarga bardosh bera olmadi, shuning uchun mashg'ulot va turnirlardan zavqlana olmadim. Jismoniy muammolar tufayli tez-tez tanaffus qilishimga to'g'ri keldi, og'riq bilan mashq qildim. SHuning uchun ham men tanaffus qilishim kerak.

Kortga qachon qaytishim mumkinligini bilmayman. Balki bir yarim oy, balki ikki, balki to'rt oylik tanaffus qilarman. Men his-tuyg'ularimga ergashaman, tanamga foyda va menga baxt keltiradigan narsalarni amalga oshirishga harakat qilaman.

Maqsadim va xohishim keyingi mavsumdan zavq olish uchun hozir to'xtash, ehtimol bu mening professional faoliyatimdagi oxirgisi bo'lishi mumkin. Bu amalga oshishiga 100 foiz kafolat bera olmayman. Ammo niyat shu.

Men va faoliyatim uchun muhim bo'lgan barcha turnirlar bilan xayrlashmoqchiman. Men kurashishni va shu daqiqadan zavqlanishni xohlayman. Hozir bu imkonsiz. Ammo ishonamanki, agar hozir tanaffus qilsam, kelasi yili menda shunday imkoniyat bo'ladi", - dedi Nadal matbuot anjumanida.