Namangan viloyati hokimi chempion sportchilarni munosib taqdirladi

Bu haqda viloyat hokimligi matbuot xizmati xabar berdi.

Tadbirda Namangan viloyati hokimi X.Bozorov madaniyat, sport va jurnalistika sohalarida ulkan yutuqlarga erishib kelayotgan namanganlik yoshlarni munosib taqdirladi. Jumladan, Xayrullo Begmatovich viloyatning mohir sportchilari hamda Tokio-2020 yozgi Olimpiya o'yinlariga licenziyani qo'lga kiritgan atletlar va yo'llanmalarga davogarlar bilan uchrashdi.

Mamlakatni hech bir soha sportchalik dunyoga tezda mashhur qila olmaydi. Etirof etish joiz, namanganlik sportchilar joriy yil davomida turli sport turlari bo'yicha O'zbekiston sport delegaciyasining xalqaro arenalardagi salmoqli g'alabalariga munosib hissa qo'shishdi. Xususan, viloyat sportchilari 2019 yilda respublika va xalqaro miqyosdagi musobaqalarda 1 009 ta oltin, 951 ta kumush, 1 512 ta bronza, jami 3 472 ta medalga sazovor bo'lishdi. Taqqoslash uchun, 2018 yilga nisbatan xalqaro miqyosdagi musobaqalarda qo'lga kiritilgan medallar 168 taga, respublika miqyosidagi musobaqalarda esa 572 taga ortdi.

Joriy yilda Namangan viloyatidan 20 nafar jahon chempioni, 22 nafar Osiyo chempioni etishib chiqdiki, bu hududda jismoniy tarbiya va sportni ommalashtirish borasidagi ezgu say-harakatlar o'z mevasini berayotganidan dalolatdir.

Namanganlik sportchilarning 2020 yilda Yaponiya poytaxti Tokio shahri mezbonlik qiladigan navbatdagi yozgi Olimpiya o'yinlarida muvaffaqiyatli ishtirokini taminlash masalasiga viloyat hokimligi tomonidan ustuvor vazifa sifatida etibor qaratilmoqda. Buning samarasi o'laroq Namangan viloyati sportchilaridan Rustam Assakalov (yunon-rum kurashi), Nilufar Zokirova, Dilnoza Rahmatova (ikkalasi ham baydarka va kanoeda eshkak eshish) hamda Nozimaxon Qayumovalar (para engil atletika) Tokio-2020 yozgi Olimpiya o'yinlari va Paralimpiya o'yinlariga 5 ta yo'llanmani qo'lga kiritishdi.

Tadbirda Namangan viloyatida jismoniy tarbiya va sportni ommalashtirish, respublika va xalqaro miqyosdagi musobaqalarda erishgan salmoqli yutuqlari orqali viloyat nufuzi va obro'-etiborini oshirishga qo'shgan munosib hissasi uchun 50 dan ziyod sportchi va trenerlarga viloyat hokimining tashakkurnomasi hamda qimmatbaho sovg'alari topshirildi.

Jumladan, yunon-rum kurashi bo'yicha jahon chempionati sovrindori, Tokio-2020 yozgi Olimpiya o'yinlariga yo'llanmani naqd qilgan Rustam Assakalovga “Malibu” rusumli avtomobil, uning treneriga “Jentra” avtomobili, karate WKF bo'yicha Osiyo chempioni, Tokio-2020 yozgi Olimpiya o'yinlari yo'llanmasi davogari Bahriniso Boboevaga “Spark” avtomobili sovg'a qilindi. Baydarka va kanoeda eshkak eshish bo'yicha jahon chempionati sovrindorlari Nilufar Zokirova hamda Dilnoza Rahmatovaga esa Namangan shahridan uy sertifikatlari taqdim etildi.

O'z navbatida namanganlik sportchilar ko'rsatilayotgan etibor va g'amxo'rlik uchun viloyat hokimligiga minnatdorlik bildirgan holda yangi yilda yanada yorqin g'alabalarga erishib, nafaqat viloyat, balki respublikamiz aholisini xushnud etish uchun astoydil harakat qilishlarini bildirdi.