"Naturallashtirilgan" sportchilardan voz kechish vaqti keldi

"SHu paytgacha O'zbekistonning Yozgi olimpiadalardagi ishtiroki "naturallashtirilgan" xorijliklarsiz o'tmagan va ular 1996 yildan 2016 yilgacha bo'lgan olimpiadalarda O'zbekiston uchun turli darajadagi medallarni keltirishgan.

Bu safargi Tokio olimpiadasida O'zbekiston nomidan qatnashgan bironta xorijlik sportchi sovrindor bo'la olmadi.

Medal olgan beshta sportchining barchasi O'zbekistonda tug'ilgan, voyaga etgan, shu erda professional sportchi o'laroq shakllangan.

Agar Tokioga borgan sportchilar ro'yxatiga qarasangiz, erkin kurashda rossiyalik Magomed Ibragimov va Jabrail SHapievlar, yunon-rum kurashida rossiyalik Rustam Assakalov, velosportda rossiyalik Olga Zabelinskaya, beshkurashda rossiyalik Alisa Faxrutdinovalar mamlakatimiz nomidan ishtirok etganini ko'rish mumkin. Bu ro'yxat yanada uzunroq ham bo'lishi mumkin edi. Masalan, 2019 yilda Meksikadan O'zbekistonga maxsus keltirilgan qilichboz Paolo Pliego Tokioga bora olmagan.

Ko'rinib turibdiki, Olimpiada o'yinlari uchun chetdan xorijlik sportchi keltirib soxta obro' va sharaf yaratish davri o'tdi.

O'zbekiston o'zining sharafini bundan buyon mamlakatda tug'ilib o'sgan va tarbiyalangan sportchilar bilan yarata oladi. Qolaversa soliq to'lovchilarning pulini turli "legionerlarga" sarflash qip-qizil soxtakorlik ham", - deyiladi postda.