Nega poytaxtdan terma jamoaga nomzod dzyudochilar yo'q? SHahar dzyudosiga masul mutaxassis bilan suhbat

Bugun Toshkent shahar dzyudo federaciyasi faoliyati doirasida ushbu mavzuga to'xtalamiz. Suhbatdoshimiz Toshkent shahar dzyudo federaciyasi bosh kotibi Jahongir Toshpo'latov.   

- Jahongir, Toshkent shahar dzyudo federaciyasining bugungi kundagi faoliyati qoniqarli darajadami? O'zbekiston dzyudo federaciyasi tomonidan poytaxtda dzyudoni yanada ommalashtirish bo'yicha topshirilgan vazifalar bajarilyaptimi? 

- Hozirda federaciyamiz karantin holatida. Lekin bu holat bizning tatilda xordiq chiqarayotganimizni anglatmaydi. Murabbiylarimiz o'z shogirdlari bilan onlayn tizimda mashg'ulotlarni davom ettirishyapti. Ular faqat turli usullarni o'rgatish bilan cheklanishmayapti. Aksincha, bunga qo'shimcha tarzda sportchilarning ruhiyatini ko'tarish bo'yicha doimiy ravishda muloqot olib borishmoqda. Professional, o'z ishini yaxshi ko'radigan murabbiy aynan shunday bo'lishi kerak. Endi karantingacha bo'lgan davr haqida gap ketganda shuni aytishim kerak-ki, Toshkent shahar dzyudo federaciyasi to'liq kuch bilan, reja asosida faoliyatini davom ettirgan. Har hafta turli yosh toifasida musobaqalar, BO'SMlarda mashg'ulotlar, murabbiylar uchun esa seminarlar o'tkazilgan. Bizning vazifamiz poytaxtda dzyudoni rivojlantirish bilan birga, uning ommaviyligini keng aholi qatlami orasida taminlashdan ham iborat. 

- Toshkent shahrida o'smirlar, yoshlar, kattalar va havaskorlar o'rtasida bir yilda nechta musobaqa o'tkaziladi? Bu son etarlimi?

- Yuqorida aytganimdek, shahrimizda deyarli har hafta turli darajadagi musobaqalar o'tkaziladi. Tan olish kerak, ularning hammasi ham katta nufuzga emas. Fikrimcha, balans bo'lishi kerak. Har bir Respublika darajasidagi musobaqa oldidan biz saralash turnirini o'tkazamiz. Bundan tashqari, turli yosh toifalari uchun Toshkent shahar kubogi musobaqasi tashkil etiladi. Bu turnirlarda 300 nafardan ziyod dzyudochilar ishtirok etadi. SHuningdek, yil davomida qo'shni davlat dzyudochilari ishtirokida xalqaro turnirlar ham o'tkaziladi. Keyin poytaxtda faoliyat yuritayotgan klublar ham muntazam ravishda o'z ochiq turnirlarini o'tkazib kelishyapti.   

- Toshkent shahrida murabbiylar va hakamlar masalasi qanday yo'lga qo'yilgan? Ularning mahoratini oshirib borish uchun seminarlar o'tkazilyaptimi?

- Darhaqiqat, bu darajada ko'p o'tkaziladigan musobaqalar uchun malakali hakamlar kerak bo'ladi. Bizda katta murabbiy va bosh hakam bor. Ular tomonidan murabbiy va hakamlar uchun har bir musobaqa oldidan seminarlar uyushtiriladi. Aksariyat hollarda murabbiy va hakamlar uchun qo'shma seminarlar o'tkaziladi. Qoidalarni hamma bilishi shart. 

- Kattalar terma jamoasida poytaxtdan dzyudochilar yo'q. Buni qanday izohlash mumkin? 

- Poytaxtda sport alohida ahamiyat kasb etadi. Buni nafaqat dzyudoda, balki boshqa sport turlari misolida ham ko'rish mumkin. Bir narsaga etibor qaratish kerak, Toshkent poytaxt bo'lgani uchun bu erda sportdan tashqari talim olish, yaxshi kasb egasi bo'lish, serdaromad ishga joylashish uchun intilish kuchli. Bu jarayonda tabiiy raqobat yuzaga keladi. Sport va kasb manfaatlari to'qnash kelganda yoshlar ko'proq ikkinchisini tanlashyapti. Ha, kattalar terma jamoasida dzyudochilarimiz yo'q. Lekin kichik yoshdagi terma jamoalarga nomzod etkazib berish bo'yicha ishlarimiz birmuncha yaxshi. Fikrimni natijalar ham tasdiqlaydi. Ammo, yuqorida aytganimdek, katta yosh toifasiga etganda ular o'zlarini kasb yoki ishga urishyapti. Ochiq aytganda, men aytgan raqobat sababida sport bilan professional shug'ullanish uchun kam vaqt qolyapti. 

- Yuzaga kelgan pandemiyadagi karantin holati o'ylash, fikrlash, xulosa chiqarish va yangi rejalarni tuzish uchun yaxshigina imkoniyat. Bu imkoniyatdan qay darajada foydalanyapsizlar?

- Birinchidan shuni aytishim kerak-ki, dzyudo yakkama-yakka kurash sport turi hisoblanadi. Sportchi hamisha mashg'ulot va musobaqa chog'ida raqib bilan "kontakt"da, yani yuzma-yuz bo'ladi. SHu holatni inobatga olgan holda birinchi galda dzyudochilarning xavfsizligini taminlashimiz kerak. Karantindan keyin ham gigienaga etiborni kuchaytiramiz. Mavjud sport zallari anticeptik vositalar bilan taminlanadi. Bu borada murabbiylar bilan ishlayapmiz. Ikkinchidan, biz karantin davrida sportchilar bilan masofadan ishlashni o'rgandik, o'zlashtirib oldik. Va siz aytgandek, shu paytgacha bo'lgan natijalarimizdan tegishli xulosalar chiqarib, yangi ish rejalarini tuzib oldik. 

O'zbekiston dzyudo federaciyasi matbuot xizmati