Nyu-Yorkda AQSH va O'zbekiston karatesi hamkorligi yo'lida memorandum imzolandi

Kelishuv besh yilga mo'ljallangan bo'lib, uning doirasida ikki mamlakat shinkiokushinkay karate vakillari o'rtasida musobaqa hamda seminarlar o'tkazish, o'zaro tajriba almashish kabi yo'nalishlar bo'yicha hamkorlikni o'z ichiga oladi. 

Hamkorlikning ilk qadami sifatida NUR-HAS karate markazi katta murabbiyi, 5-DAN qora belbog' sohibi, branch-chif (Jahon karate tashkiloti tomonidan tayinlangan vakil) Mutal Nazarov 8-21 may kunlari AQSHda bo'ldi. 

Safar davomida Las-Vegas, Nyu-York va boshqa bir qator shaharlarida xalkaro seminarlar o'tkazildi. Unda AQSH sportchilaridan tashqari koreyalik karatechilar ham ishtirok etishdi. Endi reja bo'yicha Mutal Nazarov iyun oyida Yaponiyaning Tokio shahrida fullkontakt karate bo'yicha o'tkaziladigan birinchi jahon chempionatida yurtimiz sharafini himoya qiladi.

SHundan so'ng, karatechilarimiz 21 iyun kuni Tojikiston, 29 iyunda Qozog'istondagi xalqaro musobaqalarda ishtirok etishadi. Iyul oyida Tokio shahrida yoshlar o'rtasida jahon chempionati o'tkaziladi. Bu dunyo birinchiligida ham yosh karatechilarimiz medallar uchun bahs olib borishadi. 

Bundan tashqari, barcha viloyatlarda xalkaro seminarlar va musobaqalarni taqvim rejasida belgilan muddatda o'tkazish rejalashtirilgan.