Og'ir atletika. Yosh Muhammadqodir Toshtemirov Osiyo chempionatining biryo'la uchta medalga sazovor bo'ldi

Kecha 81 kg vazn toifasi vakillari supachaga ko'tarilishdi. Ushbu vaznda yurtimiz sharafini Muhammadqodir Toshtemirov va Xojiakbar Olimov himoya qilishdi. 

Etiborlisi, aynan bizning atletlar shu kuni supachaga chiqqanlar ichida eng yoshlari edi - Muhammadqodir 2001 yil, Xojiakbar esa 2003.

Dast ko'tarish mashqida Olimov barcha urinishlari omadli chiqdi va 146 kg natija qayd etdi.

Muhammadqodir esa ushbu vazn "gigantlari" xitoylik Li Dayin va Lyu Ksyao Junga qarshilik ko'rsatishga qaysidir manoda muvaffaq bo'ldi. Sababi aynan Toshtemirov Xitoy termasi vakillariga eng yaqin kela oldi hamda bronza medalini qo'lga kiritdi. 

G'oliblik uchun kurashda Li va Lyu nafaqat raqiblaridan sezilarli darajada "qochib ketishdi" balki ketma-ket jahon va Osiyo rekordini ham yangilashga muvaffaq bo'lishdi. Avvaliga tajribali Lyu Ksyao Jun 174 kg ko'tarib, rekord o'rnatgan bo'lsa, oradan 2 daqiqa o'tar-o'tmas, Li Dayin hamyurtining natijasini 1 kgga yaxshiladi. 

Siltab ko'tarish mashqida esa barchasi o'zgarib ketdi. Muhammadqodir rejaga asosan har uch imkoniyatidan unumli foydalandi va 185, 190 va 193 kg toshni o'ziga bo'ysundira oldi. 

Undan so'ng supachaga turkmanistonlik atlet chiqdi va 195 kg toshni ko'tardi, lekin texnik xato tufayli hakamlar urinishni inobatga olishmadi. Murabbiylar vaziyatni takroran ko'rishni so'rashi, etirozlariga qaramay hakamlarning fikri o'zgarmadi. 

Dast ko'tarishda rekord o'rnatgan Li Dayin aynan oxirgi urinishda elkasidan jarohat oldi chog'i, siltab ko'tarishda birinchi urinishdayoq xatoga yo'l qo'ydi. Jarohat kutilganidan jiddiyroq bo'lib chiqdi va Li keyingi urinishlarida ham shtangani ko'tara olmadi. Oqibatda oltin uchun kurashgan Li Dayin umuman medalsiz qoldi hamda bronza oladi deb turganimiz, Muhammadqodir Toshtemirov siltab ko'tarish va ikki kurash bo'yicha kumush medalga sazovor bo'ldi.