Og'ir atletikachilarimiz xalqaro onlayn musobaqada ishtirok etishadi

Jumladan, dunyo ahli sekin-asta sport musobaqalarining shunday o'tishiga ham guvoh bo'lmoqda.

18-19 iyul kunlari Xalqaro og'ir atletika federaciyasi ilk bor katta masshtabda onlayn musobaqa tashkil qilmoqda. Unda jahonning 20 dan ziyod davlatidan 80 ga yaqin mahoratli atletlar ishtirok etadi. Ular orasida terma jamoamizning vakillarini ham uchratish mumkin.

Tarkib

Murabbiylar shtabi mazkur musobaqada quyidagi 7 nafar sportchimizni sinab ko'rish niyatida:

-73 kg: Adhamjon Ergashev (22:00);
-89 kg: Sarvarbek Zafarjonov (00:00);
-102 kg: Farhod Sobirov (02:00);
-109 kg: Akbar Jo'raev (02:00);
-55 kg: Nigora Abdullaeva (20:00);
-71 kg: Kumushxon Fayzullaeva (22:00);
-81 kg: Tursunoy Jabborova (02:00).

Yuqorida atletlarimizning chiqishi Toshkent vaqti bilan ko'rsatilgan. Ha, musobaqa tashkilotchilari mahalliy vaqt sifatida Janubiy Amerika mintaqasini tanlagan. Zero, ishtirokchi davlatlarning aksariyati g'arbiy yarim shar vakillariga to'g'ri keladi. Bir tomondan vakillarimizning irodasi va mahorati mana shunday murakkab vaziyatda yana bir karra toblanadi.

Tayyorgarlik

O'zbekiston og'ir atletika federaciyasi mazkur musobaqa tayyorgarligiga o'zgacha yondashgan. Boisi anchadan beri musobaqa ko'rmagan polvonlarimiz onlayn turnirga katta shijoat bilan hozirlik ko'rishmoqda. Federaciya rahbariyati sportchilarning mashg'ulotlardan bo'sh vaqtlarini mazmunli o'tkazish maqsadida turli ko'ngilochar tadbirlarni tashkil qilib turibdi. Dam olish paytlari vakillarimiz shaxmat, shashka, stol tennisi, voleybol kabi sport turlarida ham o'zaro raqobatlashib, turli kinofilmlar tomoshasi va kitob mutolaasi bilan bo'sh vaqtlarini unumli o'tkazishmoqda.