Osiyo chempionati. Gulruhbegim va Afruzada muhim g'alabalar

Mukofot jamg'armasi 80 000 AQSH dollarini tashkil etuvchi mazkur musobaqada O'zbekiston terma jamoasi ham katta tarkibda qatnashyapti. Qita chempionatining ayollar o'rtasidagi bahslarida 23 davlatdan 101 nafar ishtirokchi medallar uchun dona surmoqda. 

Terma jamoamiz etakchilari nihoyat 7-turda muhim g'alabani qo'lga kiritishdi. Yoshlar o'rtasida ikki karra jahon chempioni Afruza Hamdamova oq donalarda SHri-Lanka vakilasi Devindiya Gunavardhanani, bir muddat AQSH sharafini himoya qilgan Gulruhbegim Tohirjonova esa qozog'istonlik Elnaz Kaliaxmetni mag'lubiyatga uchratdi. Har ikki shaxmatchimiz 6-turda raqibalariga imkoniyatni boy berib qo'yishgan edi. 

Tajribali shaxmatchimiz Nodira Nodirjonova hindistonlik Manisha Kirandan ustun keldi. Bu turda Zilola Aktamova, Liliya Belaya va Odina Olimova ham o'z partiyalarida zafar quchishdi. Guldona Karimova, Nilufarxon Imomqo'zieva, Asal Salimova, Barchinoy SHokirjonova, Marjona Malikova, Rukiya Olimova, Madinabonu Xalilova raqibalaridan engilishdi. Umida Omonova va Mohim O'rozmuhammedova durang qayd etishdi. 

Ettinchi turdan so'ng qizlarimiz orasida eng yaxshi natijani Gulruhbegim Tohirjonova va Afruza Hamdamova qayd etib turibdi. Gulruhbegim 5 ochko bilan qo'shimcha ko'rsatkichlarga ko'ra 9-o'rinni band etgan. SHuncha ochkoga ega Hamdamova 11-pog'onadan joy olgan. Turnir jadvalida 6 ochkodan to'plagan hindistonlik Seshadri Srija va mo'g'ulistonlik Bat-Erdene Mungunzul qo'shpeshqadamlik qilmoqda. Keyingi o'rinlardagi Valentina Gunina, Anastasiya Bondaruk va Agraval Vantika hisobida 5,5 ochkodan bor.   

Bugun o'tkaziladigan 8-turda Tohirjonova oq donalarda rossiyalik Valentina Guninaga qarshi bahs olib boradi. Hamdamova esa qora donalarda o'zi singari 5 ochkoga ega xindistonlik Geyt Svati bilan hisob-kitob qiladi.