Otabek Husanov: Olimpiada medalini ham qo'lga kiritishimga ishonaman

Unda yurtimizning barcha hududlaridan kelgan 800 nafarga yaqin yosh dzyudochilar jami 20 ta vazn toifasida kuch sinashdilar.

SHiddatli bahslarga boy o'tgan mamlakat birinchiligida -60 kg vazn toifasida O'zbekiston chempioni degan sharafli nomni qo'lga kiritgan va «Eng chiroyli usulni qo'llaganligi uchun» maxsus nominaciyasida g'olib topilgan Otabek Husanovni suhbatga tortdik.

Otabekning yana bir muvaffaqiyati shundaki, u chempionat davomida barcha raqiblarini Ippon bahosi bilan mag'lubiyatga uchratib, tomoshabinlar etirofiga sazovor bo'ldi.

–Bolalagim boshqa tengdoshlarim, sinfdoshlarimdan farqli o'tayapti. Sababi kichkinaligimdan mashg'ulot zallari, kimono va dzyudo musobaqalarini tahliliga bag'ishlangan suhbatlar ichida ulg'aymoqdaman, desam mubolag'a bo'lmaydi.

Otam Otamurod Husanov – murabbiy, dzyudo bo'yicha yoshlarga saboq berib keladi. Aynan 5-6 yoshimdan boshlab otamning qo'li ostida shug'ullanishni boshlaganman. Bir necha yil faqat chigal yozdi mashg'ulotlarini bajarardim. Bu ko'pam yoqmasdi. Tatamida o'zimni sinab ko'rgim kelardi. Vaqt o'tishi bilan hammasi sekin-sekin bo'lar ekan. 2018 yil Respublika Olimpiya zaxiralari kolleji dzyudo bo'limiga o'qishga qabul qilindim. Murabbiylarim Sunnatilo Fayziev va Navro'z Jo'raqobilovlar bilan birga o'z ustimda tinimsiz ishlab, musobaqalarga tayyorgarlik olib borayapman. Bitta usulni yillab o'rganishimizga to'g'ri kelgan paytlar ham bo'lgan. Hozir ham shunday. Murabbiyim qayta qayta o'rganish, sabrli bo'lishni ko'p aytadilar.

Bilasizmi, avvallari musobaqalarda ishtirok etish, O'zbekiston chempioni bo'lish va kelajakda olimpiada o'yinlari g'olibi bo'lish haqida o'ylasam, bu tasavvurimda qandaydir uzoq yo'l va qorong'u ranglarda ko'rinar edi.

Muhtaram Prezidentimiz yoshlarga, ayniqsa yosh sportchilarga juda katta imkoniyatlar va sharoitlar yaratib bermoqda. Ana shu imkoniyatlardan unumli foydalanib, 2018 yil Samarqandagi «Maroqand» xalqaro turnirida, 2019 yil Qozog'istondagi “Nur Sultan cup” xalqaro turnirida va yurtimizda o'tkazilgan bir nechta turnir ham chempionatlarda g'oliblikni qo'lga kiritdim.

Endi orzularim va maqsadlarim ko'z oldimda aniq va yorug' gavdalanadi.

Kelajakda olimpiada o'yinlari, Jahon va Osiyo chempioni bo'lishimga ishonaman. Bu yutuqlar esa o'z ustimda tinimsiz ishlash va mashaqqatli mehnatlar evaziga qo'lga kiritilishini ham yaxshi his qilayapman.

Tengdoshlarimga ham shuni maslahat beraman. Sportga qiziqasizmi, kelajakda ulkan yutuqlarni kiritmoqchimisiz? Unda shug'ullanishni bugundan boshlang. Qiyinchilik, mag'lubiyatlardan qo'rqmang. Qiyinchilik va mag'lubiyatlarsiz hech bir yutuqqa erishib bo'lmaydi.