O'zbekiston boks federaciyasi tomonidan tashkil etilgan "Eng yaxshi onlayn murabbiy" tanlovi g'olibi taqdirlandi

Ushbu tanlovimizda ko'plab professional va havaskor murabbiylar o'z omadlarini sinab ko'rishdi. Tabiiyki tanlov uchun kelib tushgan videolar ichidan g'olibni aniqlab olish O'zbekiston boks federaciyasi tanlov komissiyasi uchun oson bo'lmadi. Uzoq muhokamalardan so'ng Toshkent viloyati Bo'stonliq tumanidagi sport maktabida faoliyat olib borayotgan Otabek Qosimov birinchi o'rinni egalladi. 

Bugun O'zbekiston boks federaciyasi binosida murabbiyni taqdirlash marosimi o'tkazildi. Unda O'zbekiston boks federaciyasi rahbariyati ham qatnashib, murabbiyni erishilgan yutuq bilan tabrikladi. Bunday tanlovlar boksni yanada ommalashtirish uchun o'z hissasini qo'shishi alohida takidlandi. Tanlovimiz g'olibiga pul mukofoti va sertifikat taqdim etildi.

"To'g'risini aytsam, tanlovda g'olib chiqishimni kutmagandim. Bir necha kun oldin men bilan aloqaga chiqib, ushbu konkurs g'olibi bo'lganimni aytishdi. Tanlovda ko'plab murabbiylar qatnashishdi. Omad men tomon kulib boqdi va yakunda birinchi o'rin menga nasib etdi. Fursatdan foydalanib, tanlov tashkilotchilariga o'z minnatdorchiligimni bildirib o'taman", - dedi Otabek Qosimov. 

O'zbekiston boks federaciyasi matbuot xizmati